Бухоро шаҳрида ўтказилган «Орият» махсус тезкор профилактик тадбири давомида эркак ўз уйида фуқароларнинг жинсий алоқа қилиши учун шароит яратиб бергани аниқаланди. Бу ҳақда вилоят ички ишлар бошқармаси ахборот хизмати хабар берди.
Маълум бўлишича, вилоят бўйлаб ўтказилаётган «Хавфсиз ҳудуд» кенг қамровли профилактик тадбирлари доирасида Бухоро шаҳри ички ишлар органлари фаолиятини мувофиқлаштириш бошқармаси ходимлари томонидан «Орият» тезкор тадбири ўтказилган. Жараён давомида Бухоро шаҳри Алпомиш кўчасида яшовчи, 1980 йилда туғилган К.О. исмли эркак яшаш хонадонида фуқаролар Ж.Ш. ва Н.Н.нинг жинсий алоқа қилиши учун 60 000 сўм эвазига етарли шарт-шароит яратиб бериб, фоҳишахона ташкил қилгани аниқланган.
Мазкур ҳолат юзасидан шаҳар ИИО ФМБ ҳузуридаги тергов бўлими томонидан фуқаро К.О. га нисбатан Жиноят кодексининг 131-моддаси (қўшмачилик қилиш ёки фоҳишахона сақлаш) 2-қисми билан жиноят иши қўзғатилиб, дастлабки тергов ҳаракатлари олиб борилмоқда.
Изоҳ (0)