Oliy Majlis Qonunchilik palatasida 15-avgust kuni Ekologik partiya fraksiyasining navbatdagi yig‘ilishi bo‘lib o‘tdi. Unda fraksiya a’zolari tomonidan dastlab “O‘simliklarni himoya qilish to‘g‘risida”gi qonun loyihasi birinchi o‘qishda muhokama etildi.
Ta’kidlanishicha, mineral o‘g‘itlar hamda kimyoviy vositalar biologik faol birikmalar bo‘lib, ular bilan ishlash qoidalarining buzilishi inson salomatligiga, o‘simlik va hayvonot dunyosiga jiddiy zarar keltiradi, oziq-ovqat mahsulotlaring sifatini pasaytiradi. Qishloq xo‘jaligida mineral o‘g‘itlar va kimyoviy vositalardan foydalanishning kengayish tendensiyasini hisobga olgan holda xavfli kimyoviy moddalarning qishloq xo‘jaligiga ta’sirini maqbul xavf darajasiga qadar kamaytirishni taqozo etmoqda.
Mazkur qonun loyihasida o‘simliklarni himoya qilish sohasini tartibga solish, o‘simliklarni himoya qilish sohasidagi davlat boshqaruvi va nazorati, o‘simliklarni himoya qilish vositalarilariga qo‘yiladigan xavfsizlik talablari, kimyoviy moddalar, biologik vositalar va materiallarni saqlash, qo‘llash, zararsizlantirish, yo‘q qilib yuborish, utilizatsiya qilish, tashish va ko‘mib tashlashga doir masalalarni tartibga solish nazarda tutilmoqda.
Qonun loyihasining qabul qilinishi natijasida mineral o‘g‘itlar va o‘simliklarni himoya qilish vositalarini mamlakat hududiga olib kirishdan boshlab ularni muomaladan chiqarishgacha hisobga olish va monitoring qilish ta’minlanadi hamda ulardan to‘g‘ri foydalanish nazorat qilinadi.
Yig‘ilishda qonun loyihasi yuzasidan fraksiyaning taklif va mulohazalari bildirilib, qo‘llab-quvvatlandi. Shundan so‘ng fraksiya a’zolari tomonidan “Raqobat to‘g‘risida”gi, “Volontyorlik faoliyati to‘g‘risida”gi O‘zbekiston Respublikasining qonuniga volontyorlik faoliyati sohasida davlat boshqaruvini takomillashtirishga qaratilgan o‘zgartish va qo‘shimchalar kiritish haqida”gi qonun loyihalari muhokama etilib, kun tartibidagi masalalar yuzasidan tegishli qaror qabul qilindi.
Izoh (0)