Журналист Стивен Эрлангернинг The New York Times газетасида чоп этилган мақоласида Россия ва Туркия президентлари ўртасидаги ҳамкорликдан Ғарб нега бунчалик ғазабланаётгани маълум қилинган.
Унинг фикрича, икки давлат ўртасидаги илиқ муносабатлар Туркиянинг НАТОдаги иттифоқчилари орасида «катта ғазаб» уйғотган, чунки президент Ражаб Тоййиб Эрдўғон «Ғарб мамлакатлари курашаётган санкциялар тўғонида сезиларли бўшлиқ яратмоқда».
Журналист Анқара Россияга қарши санкциялар қўллашдан бош тортганини эслатди. Эрлангернинг ёзишича, Туркия расмийлари санкцияга учраган Россия банклари билан муомала қилиш йўлларини ўрганмоқда ва Россиянинг кредит карталари билан тўловларни қабул қилишга тайёр.
Рус гази эса Турк қувурлари орқали «тўсиқсиз» оқади. Бундан ташқари, Туркия арзон энергия ва Россия компаниялари билан тузилган битимлардан фойда олади. Москва ҳам республикани Суриядаги курд кучларига қарши ҳаракатларида қўллаб-қувватлайди.
Ўз навбатида, Россия Туркия билан иқтисодий ҳамкорликни кенгайтиришга интилмоқда.
The New York Times шарҳловчисининг прогнозига кўра, Эрдўғон келаси йилги сайловлар олдидан қийин аҳволда. Мамлакат иқтисоди таназзулга юз тутмоқда, Марказий банкда валюта етишмаяпти, инфляция йилига 80 фоизни ташкил қилмоқда.
Муаммолар икки президентни ҳар қачонгидан ҳам яқинроқ қилди. Охирги уч ҳафта ичида улар икки марта учрашишди, — дейди Эрлангер.Владимир Путин ва Ражаб Тоййиб Эрдўғон ўртасидаги сўнгги музокаралар 5 август куни Сочида бўлиб ўтган эди. Россия раҳбари икки давлат ўртасидаги савдо-иқтисодий алоқаларни ривожлантириш бўйича меморандум имзолаш режалари борлигини маълум қилди ва туркиялик ҳамкасбига «дон келишуви»да воситачилик қилгани учун миннатдорчилик билдирди.
Изоҳ (0)