Давлат божхона қўмитасининг «Тошкент-Аэро» ихтисослаштирилган божхона комплекси ходимлари ҳаво йўллари орқали тилла ва заргарлик буюмларининг ноқонуний олиб ўтилишининг олдини олишга қаратилган тезкор чора-тадбирларни мунтазам давом эттирмоқда. Бу ҳақда қўмита ахборот хизмати хабар қилди.
Жумладан, «Тошкент» халқаро аэропортида Истанбул—Тошкент рейси бўйича парвозини якунлаган йўловчилардан бири божхонадан яшил йўлак орқали ҳаракатланар экан, унинг безовталаниши божхона ходимларининг диққатини тортган. Шундан сўнг унга тегишли қўл юклари кўздан кечирилганда, унинг сумкаси ичида йўловчи божхона декларацияси ва божхона ходимларининг оғзаки сўровида маълум қилинмаган заргарлик буюмлари яширилгани фош бўлган.
Шунингдек, йўловчи боласини ўтқазган коляска чўнтагига ҳам тилла тақинчоқларни яширгани аниқланган. Ушбу шахс божхона назоратига тақдим қилмасдан туриб, жами оғирлиги 1 килограмм 198 граммни ташкил қилувчи тилладан ишланган заргарлик буюмларини олиб киришга уринган вақтда тўхтатиб қолинган.
Мазкур заргарлик буюмларининг умумий қиймати эса салкам 590 миллион сўмни ташкил қилган.
Таъкидланишича, республика божхоначилари томонидан жорий йилнинг ўтган 7 ойи давомида аниқланган 177 та божхона қонунбузилиши ҳолатларида қиймати 24 миллиард 663 миллион сўмлик салкам 16 килограмм оғирликдаги тилла ва заргарлик буюмларининг ноқонуний олиб ўтилишига чек қўйилган. Тўхтатиб қолинган заргарлик буюмларининг миқдори эса ўтган йилнинг шу даврига нисбатан 40 фоизга ошган.
Эслатиб ўтамиз, айрим турдаги товарларни божсиз олиб киришнинг чекланган меъёрларига кўра, жисмоний шахслар республикамизга қимматбаҳо металл ва қимматбаҳо тошлардан ясалган заргарлик буюмларидан – 65 граммгача олиб киришлари мумкин.
Ҳозирда юқоридаги ҳолат юзасидан божхона органлари томонидан терговга қадар текширув ҳаракатлари олиб борилмоқда.
Изоҳ (0)