Тошкент шаҳрининг Янгиҳаёт ва Бектемир туманларида гиёҳванд модда ва дориларни олиб юрган шахслар ушланди. Бу ҳақда Йўл ҳаракати хавфсизлиги хизмати хабар берди.
Хусусан, текширувлар давомида 7 август куни соат 16:45 да Янгиҳаёт туманида жойлашган «Янгиҳаёт» блок-постида хизмат олиб бораётган ЙПХ ходими томонидан Тошкент вилоятидан пойтахтга кириб келаётган Nexia тўхтатилиб, холис ва гувоҳлар иштирокида текширилганда йўловчи — 2000 йилда туғилган А.И.нинг ёнидан қоғозга ўралган, жигарранг, ўткир ҳидли, қуритилган ўсимлик моддаси топилган.
Ҳолат юзасидан тегишли ҳужжатлар расмийлаштирилиб, фуқаро А.И. ва топилган модда туман ИИО ФМБга топширилган
Бундан ташқари, 7 август куни соат 22:15 да Янгиҳаёт туманида жойлашган «А.Турбанов» ЙПХ масканида хизмат олиб бораётган ЙПХ ходимлари томонидан Тошкент вилоятидан пойтахтга кириб келаётган Matiz тўхтатилиб, холис ва гувоҳлар иштирокида текширилганда йўловчи — 1991 йилда туғилган С.Ф.нинг сумкасидан 11 дона «Тропикамид» номли психотроп дори воситалари топилган.
Мазкур ҳолат юзасидан тегишли ҳужжатлар расмийлаштирилиб, фуқаро С.Ф. ва топилган воситалар Янгиҳаёт тумани ИИО ФМБга топширилган.
8 август куни соат 00:10 да Бектемир туманида жойлашган «Шарқ» ЙПХ масканида хизмат олиб бораётган ЙПХ ходимлари томонидан Тошкент вилоятидан пойтахтга кириб келаётган ҳайдовчи — 1997 йилда туғилган С.С. бошқарувидаги Nexia тўхтатилиб, холис ва гувоҳлар иштирокида текширилган. Автомобиль салонидан 2 дона целлофанга солинган, оқ рангли, ўткир ҳидли, кукунсимон моддалар топилган. Шунингдек, ушбу автомобилда бўлган йўловчи — 1994 йилда туғилган Ж.М.нинг ёнидан 1 дона «Тропикамид» ва 29 дона «Регапен" номли психотроп дори воситалари топилган.
Мазкур ҳолат юзасидан тегишли ҳужжатлар расмийлаштирилиб, фуқаролар ва топилган воситалар Бектемир тумани ИИО ФМБга топширилган.
Изоҳ (0)