Instagram тармоғининг айрим саҳифаларида хонанда Шаҳзода санъатни бутунлай тарк этгани ҳақидаги маълумотлар тарқалди. Шаҳзоданинг узоқ йиллик продюсери Даврон Муқимов «Дарё» мухбири Наргиза Муродовага бу хабарлар мутлақо ёлғон эканлигини маълум қилди.
Хонанданинг ўзи ҳам мазкур постга муносабатини билдирди.
— Шаҳзоданинг санъатдаги фаолиятига 20 йил бўлган бўлса, мен у билан 18 йил бирга ишладим. Ўтган 20 йил давомида у тинимсиз меҳнат қилди, деб бемалол айтоламан. Яккахон концерт, клип ва янги қўшиқларнинг кетма-кетлиги узилмаган. У бир кун ҳам дам олмаган санъаткорлар рўйхатига киради. Ҳатто ҳомиладор бўлганида ҳам, яккахон концерт дастурини берган. Туғуруқдан кейин ҳам оналик таътилига чиқмай, ижодини давом эттирган.Баъзи ижтимоий тармоқ саҳифалари ўз обуначиларини кўпайтириш мақсадида «Шаҳзода санъатни бутунлай тарк этди», деган ёлғон хабар тарқатишган. Энг қизиғи, бу гапларни гўёки мен айтганмишман. Очиғини айтаман, айнан шу масалада мен билан ҳеч ким боғланмади ва Шаҳзоданинг санъатни тарк этиши ҳақида ҳеч кимга маълумот берганим йўқ. Бу мутлақо ёлғон маълумот, — дейди Даврон Муқимов.
Продюсер Даврон Муқимов Шаҳзода билан жиддий тортишиб қолгани ҳақида миш-мишларга ҳам ойдинлик киритди.
— Шоу-бизнесда узоқ вақт бирга ишлаш жуда қийин. Аммо мен Шаҳзода билан 18 йил бирга ишладим. Бу қисқа муддат эмас. Бунинг сабабига кўпчилик қизиқади. Шаҳзода билан ўртамизда бошлиқ ва ишчи деган тушунча бўлмаган. У билан яқин дўст ва опа-укадек бўлиб кетганмиз. Гарчи ҳозирча у ижод қилмаётган бўлса-да, ўртамиздаги муносабатлар сақланиб қолган. Оилавий дўстмиз, қўнғироқлашиб, учрашиб ҳол-аҳвол сўраймиз. У ҳар битта қилаётган лойиҳамни биринчилардан бўлиб кўриб, ўз муносабатини билдиради, — дейди Даврон Муқимов.
Ижодий танаффус сабаб одамлар орасида «У кучли депрессияга тушиб қолган» каби гап-сўзлар тарқалмоқда. Унинг ижоддан чекинишига асосий сабаб нима эканлигини очиқлай оласизми?
— Бугунги кунда Шаҳзода ҳордиқ чиқармоқда. У қачондан ижодга қайтиши ҳақида ҳам маълумот беролмайман. Чунки у ич-ичидан ижодга қайтишни исташи керак. Соғиниб саҳнага қайтгандагина, у ҳақиқий ижод бўлади. Мухлисларга фақат бир нарсани айтоламан. Балки Шаҳзоданинг ижодга қайтишига илҳомнинг етишмаётгани сабаб бўлиши ҳам мумкин. Ишончим комилки, у саҳнага қайтса, санъатимизда ҳақиқий «портлаш» бўлади, — дейди хонанда Шаҳзоданинг продюсери Даврон Муқимов.
Мавзуга доир:
- Санъатни тарк этганини айтган, бироқ маълум муддатдан сўнг яна ижодга қайтган ўзбек шоу-бизнеси вакиллари (видео)
- «Бошқа йўналишларда ривожланмоқчиман». Дурдона Қурбонова санъатни тарк этишини маълум қилди (видео)
- Шоу-бизнесни тарк этган «Уммон»чи Шоҳрух шоу-бизнесдан кетганлар ва Жаҳонгир Отажонов ҳақида гапираётганларга муносабат билдирди (видео)
- Дилдора Ниёзованинг турмуш ўртоғи унинг санъатни бутунлай тарк этгани ҳамда тўйларга чиқмаслигини маълум қилди. Хонанданинг ўзи бу гапларни инкор этди (видео)
Изоҳ (0)