Кинофильм, видео, кўрсатувлар жараёнлари ва ёки турли хил трюкларни бажариш ҳар доим ҳам кўнгилдагидек натижа бермайди. Бу жараён давомида турли хил жароҳатларни олиш ҳам мумкин. Ўзбек шоу-бизнес оламида касбий фаолияти сабаб турли хил жароҳат олган машҳурлар айнан шунга мисол бўла олади. «Дарё» нашри касбий фаолияти давомида турли хил жароҳатларни олган машҳурлар ҳақида маълумот беради.
Баҳора Арслонова
Актриса Баҳора Арслонова «Мардикор аёл» сериалининг суратга олиш жараёнида йиқилиб бошидан жароҳат олган. У сериалда йиқилиб тушиши керак бўлган саҳнада иштирок этган. Суратга олиш жараёнидан кейин актриса ҳақиқатан ҳам йиқилганида ёмон аҳволга келганини айтган.
Ботир Имомхўжаев
Актёр, телебошловчи Ботир Имомхўжаев клипга суратга тушаётган вақтда тўсатдан оёғи сирпаниб юзтубан йиқилган ва жароҳат олган. Икром Али бошчилигида суратга олинаётган клипда у актрисани қувлаган ва шундан кейин бу ҳолат юз берган. Актёр суратга олиш жараёнларидан сўнг соғлиғи ҳақида ҳеч қандай маълумот бермади.
Йигитали Мамажонов
Актёр Йигитали Мамажонов «Эсимда йўқ» фильмининг суратга олиш жараёнида трюк бажараётган вақтда йиқилиб тушган. У фаолияти давомида бундан ҳам ёмон жароҳат олиши мумкин бўлган трюкларни бажарганини айтган.
Бундан ташқари у яна бир суратга олиш жараёнида жароҳатланганини маълум қилган эди. «Суратга олиш ишлари осон эмас. Анчадан бери жароҳат олмаган эдим, бўлиб туради», — дейди актёр.
Ситора Фармонова
Актриса Ситора Фармонова «Байконур» фильмида йиқилиб тушиб оғир жароҳат олган. Бу ҳақда унинг онаси Замира Фармонова «Севимли» телеканалининг «Машҳурлар» кўрсатувига берган интервьюсида айтиб ўтган.
«Қизим Сетора немис режиссёри суратга олаётган «Байконур» фильмида суратга тушган. Жуда яхши рол ўйнаган. Кинонинг суратга олиш жараёнида атрофига мармар терилган сузиш ҳавзасига нимадир бўлиб йиқилиб тушган. Шундан кейин унинг бўйни йиртилиб очилиб қолган. Шифокорга олиб боришган, тикамиз дейишган.
Режиссёр эса тикиш мумкин эмас, бу қиз бизда рол ўйнаяпти, ҳар бир кунимиз белгиланган унинг жароҳати қачон битади деб кута олмаймиз деган. Тикишга рухсат бермагандан кейин қизим мотоцилкни ижарага олиб шифокорга ўзи бориб даволанган.
Рол ўйнаб бўлгандан кейин уйга келди, шунда қарасам бўйнида бинт бор. Бўйнингга нима қилди десам, ҳеч нарса деди. Кўрсатмагунча қўймадим, кейин қарасам 3-4 см жой йиртилиб очилиб қолган. Шунда шифокорлар шукр қилинг, бу жароҳат билан тирик қолиш камдан-кам учрайди деган.
Ўшанда шу аҳволда бўлса ҳам суратга олиш жараёнларининг охиригача иштирок этган. Эсласам йиғлайман, жуда ёмон бўлиб кетаман, онага қийин», — дейди актрисанинг онаси.
Бундан ташқари, актриса Россияда бўлиб ўтаётган «Қувноқлар ва зукколар» ўйини жараёнида ҳам қаттиқ йиқилганини ёдга олади.
«Саҳнага чиққанимизда бутун танам билан орқага қараб йиқилиб кетганман. Бутун залдаги томошабинлар қўрқиб кетишган. Ҳатто Масляков ҳам хавотирга тушган. Шунда зўрға ўзимни тутиб, жойимдан турганимда жамоамиз сардори ‘Ўзингни қўлга ол, фақат йиғлаб юборма’, деганида кўз ёшларимни тийиб, юзимни қўлим билан яшириб олганман. Суратга олиш ишлари тугаганида эса саҳна ортига ўтиб, оғриқдан роса йиғлаганман», — дейди актриса.
Зилола Ғуломова
Зилола Ғуломова «Зебо» сериалининг суратга олиш жараёнида эҳтиётсизлиги сабаб оёғини синдириб олган.
«Азизлар, бу пиар ҳам, суратга олиш жараёнлари учун ҳам қилинган эмас. Бу видеони қўйишимнинг ўзига яраша сабаблари бор, чунки ҳозирги кунда ҳар бир қилаётган ишингизни, айтаётган гапингизни исботлаб бермасангиз қийин. Майли, ҳеч қиси йўқ. ‘Зебў сериалининг суратга олиш жараёнида эҳтиётсизлигим сабабли оёғим тойиб йиқилиб тушдим. Яхшиликка, ҳаммаси яхши, энди ўрганамиз, хафа бўлиш, чекиниш йўқ», — дейди актриса.
Нигина Анорбоева
Нигина Анорбоева Ҳосила Раҳимованинг «Қуря-қур» клипининг суратга олиш жараёнида ияк қисмидан қаттиқ жароҳат олган. Актриса минган от жуда ҳуркак бўлган, ижодкорлар бу ҳақда уни огоҳлантирган. Шунга қарамай актриса отдан қўрқиб уни ҳуркитган, от эса уни узоқ масофага олиб кетган ва бир жойда тўсатдан тўхтаб актрисани ирғитиб юборган. Натижада актриса отдан қаттиқ йиқилган ва унинг ияк қисми жароҳатланган.
Паризода
Рақс санъатида ўз ўрнига эга бўлган раққоса Паризода тўй хизматларининг бирида боши айланиши сабабли йиқилиб тушган. Бу каби ҳолатлар Паризоданинг касбий фаолияти давомида бир неча бор такрорланган.
Феруза Норматова
Инстаблогер, актриса Феруза Норматова 2021 йилда Туркияга саёҳатга борган ва у ерда видео олаётган вақтда оёғи сирпаниб йиқилиб тушган. Кейинроқ актриса аҳволининг яхши экани ҳақида мухлисларига маълум қилган.
Мавзуга доир:
- Бону, Афсона, Диёр Маҳкамов ва бошқа санъатни тарк этган машҳурлар бугун нима иш билан банд? (видео)
- Украин, рус, қозоқ ва эроний — ўзга миллат вакили бўлса-да, соф ўзбек тилида ижод қилаётган машҳурлар (фото)
- Руслан Шарипов, Ҳусниддин Холиқов ва қўшиқлари фарзандлари томонидан қайта куйланган бошқа марҳум санъаткорлар (видео).
- Ҳамон оила қурмай, оқ отдаги шаҳзодасини кутаётган ўзбекистонлик санъаткорлар (видео).
Изоҳ (0)