Andijon viloyati hokimi Shuhrat Abdurahmonov futbol bo‘yicha o‘tkazilgan DXX kubogi viloyat bosqichi g‘olib jamoasining har bir o‘yinchisiga 10 million so‘mdan pul mukofoti berdi. Bu haqda “Daryo”ga viloyat hokimligi axborot xizmati xabar berdi.
Ma’lum qilinishicha, Andijon davlat tibbiyot institutida DXX kubogining viloyat bosqichida Asaka tumanining “Yuksalish” mahallasi jamoasini 2:1 hisobida mag‘lub qilgan Andijon tumanining “Poloson” mahallasi jamoasi taqdirlangan.
Unda ishtirok etgan viloyat hokimining yoshlar siyosati, ijtimoiy rivojlantirish va ma’naviy-ma’rifiy masalalar bo‘yicha o‘rinbosari Nasibillo Mo‘minov viloyat hokimining tashabbusiga asosan g‘olib jamoa o‘yinchilarining har biri — 21 nafar kishi 10 million so‘mdan mukofot pullari bilan rag‘batlantirilganligini ma’lum qilgan.
Avvalroq musobaqa g‘oliblarini taqdirlash marosimida ishtirok etgan viloyat hokimi Shuhrat Abdurahmonov ikkinchi o‘rinni olgan Asaka tumani yoshlarining ko‘rsatgan o‘yini e’tirof etib, ularning mahallasida sport maydoni qurib berishni va’da qilgani haqida xabar berilgandi.
Izoh (0)