Тошкент вилоятида газ таъминоти бўлими бошлиғи ишдан олинди, яна бир ходимга жиноят иши қўзғатилди

Тошкент вилоятининг Тошкент туманида «Тошкенттумангаз» газ таъминоти бўлими бошлиғи ишдан олинди, сервис хизмати бўлими ходимига жиноят иши қўзғатилди. Бу ҳақда «Ҳудудгазтаъминот» матбуот хизмати хабар берди.

«Ҳудудгазтаъминот» АЖнинг Комплаенс-назорат бошқармасининг маълум қилишича, июль ойида «Нанила фарм» МЧЖ раҳбари  «Тошкенттумангаз» газ таъминоти бўлимининг сервис хизмати бўлими ходими Д.Ҳ.дан янги газ ҳисоблаш ускунасини ўрнатишда кўмак беришни ва 13 миллион сўм миқдоридаги қарздорликни ёпиб беришни сўраган. Аввалроқ эса, МЧЖ раҳбари «Тошкенттумангаз» газ таъминоти бўлими бошлиғи И.Й.га ёрдам сўраб мурожаат қилган, аммо ундан рад жавобини олган.

Сервис хизмати ходими Д.Ҳ. «Нанила Фарм» МЧЖ раҳбарининг такрорий қўнғироқ ва илтимосларидан сўнг масалани ҳал қилишда кўмаклашишга қарор қилади ва мукофот сифатида 8 миллион сўм сўраган. Туман ошхоналаридан бирида 300 минг сўм ва 700 доллар миқдорида пора олаётган пайтида ҳуқуқ-тартибот идоралари томонидан қўлга олинган.

Вазиятни ўрганиш давомида аниқланишича, «Нанила Фарм» МЧЖ табиий газдан қарздорлиги учун газ таъминоти тармоғидан узиб қўйилган. Бугунги кунда ўзига юклатилган вазифага лозим даражада ёндашмаганлиги ва бепарво муносабатда бўлгани учун «Тошкенттумангаз» газ таъминоти бўлими бошлиғи И.Й. билан меҳнат шартномаси бекор қилинган. Сервис хизмати ходими Д.Ҳ.га нисбатан ўрнатилган тартибда жиноий иш қўзғатилган бўлиб, тергов ҳаракатлари олиб борилмоқда.

«Ҳудудгазтаъминот» газ таъминоти ходимларидан ноқонуний хатти-ҳаракатлар кузатилганда зудлик билан фуқаролардан 1104 қисқа рақами билан боғланишларини ёки Facebook’даги «Газ таъминотидаги муаммолар ва уларни ҳал этиш йўллари» гуруҳига хабар юборишга чақирди

«Бугунги кунда тизимда замонавий ахборот технологиялари жорий этилган бўлиб бунда инсон омилининг таъсир доираси мавжуд эмас. Ходимлар томонидан Табиий газ ҳисобини автоматлаштирилган тизимига кириш, шунингдек газ истеъмоли ҳажмлари кўрсаткичларини камайтириш имкониятига эга эмас. Шу боис ҳар қандай ноқонуний келишишлар бефойда ва мантиқсиздир», — дейилади «Ҳудудгазтаъминот» хабарида.