Хоразм вилоятининг Хонқа туманидаги боғчада 5 ёшли бола вафот этгани ҳақида хабар берилган эди. Вилоят прокуратураси ҳолат юзасидан расмий маълумот берди.
Аниқланишича, Хонқа тумани, «Тома» маҳалласида жойлашган 24-сон давлат мактабгача таълим ташкилоти 2-катта гуруҳ тарбияланувчиси 5 ёшли Ш.Ў. 3 август куни боғчада тушликдан кейин ўзини ёмон ҳис қила бошлаганини пайқаган тарбиячи А.Р. боғча ҳамшираси А.Ж.ни чақирган.
Ҳамшира томонидан болага биринчи ёрдам кўрсатилган ва бу ҳақда тез тиббий ёрдам ҳамда боланинг ота-онасига хабар берилган. Бола тез тиббий ёрдам машинасида Хонқа ТТБ олиб борилган ҳамда кўрсатилган тиббий муолажаларга қарамасдан тиббиёт бирлашмаси жонлантириш бўлимида вафот этган.
Марҳум боланинг ота-онасининг сўзларига кўра, Ш.Ў.нинг тутқаноғи тутиб турган. Бироқ бу ҳақда мактабгача таълим муасасаси ходимларини огоҳлантиришмаган, шунингдек, бола эпилепсия ёки бошқа касаллик билан тиббиёт бирлашмаси ҳисобида турмаган.
Хабарда айтилишича, мазкур ҳолат юзасидан Хонқа туман прокуратураси томонидан терговга қадар текширув олиб борилмоқда, текширув вилоят прокуратураси томонидан назоратга олинган.
Эслатиб ўтамиз, 28 июль куни Қашқадарё вилояти Шаҳрисабз шаҳридаги боғчада тарбияланувчининг опаси устига шиша синиқлари тушиши оқибатида вафот этганди. 1 август куни Наманган вилояти Чуст туманидаги боғчада тилини чайнаб юборган 5 ёшли бола вафот этганди.
Изоҳ (0)