ДСҚ чек берилмагани тўғрисидаги шикоят бўйича ўтказиладиган солиқ текшируви ҳақида маълумот берди

Давлат солиқ қўмитаси агар тадбиркорга чек берилмагани ҳақида шикоят келиб тушса, солиқ текшируви қандай ўтказилиши ҳақида маълумот берди.

Қайд этилишича, бундай ҳолда Вазирлар Маҳкамасининг 2021 йил 7 январдаги 1-сонли қарорига асосан пулли ҳисоб-китобларни амалга оширишда назорат-касса техникаси (НКТ) қўлланилиши юзасидан сайёр солиқ текшируви ўтказилади. Жумладан қуйидагилар текширади:

• солиқ тўловчи томонидан фойдаланилаётган НКТ ва ҳисоб-китоб терминали тегишли қонун ҳужжатлари талабларига мувофиқлиги;
• харидорларга НКТ чеки ёки унга тенглаштирилган бошқа ҳужжатлар берилиши.

Сайёр солиқ текширувини тайинлаш тўғрисидаги буйруқ уни амалга ошириш дастурини тасдиқлайди, унда текширилиши керак бўлган масалалар рўйхати акс эттирилади.

Солиқ солиш объектлари ва солиқ солиш билан боғлиқ объектлар тўғрисидаги ахборотни аниқлаштиришда ушбу дастурга асосан қуйидагилар текширилиши мумкин:

• давлат рўйхатидан ўтганлиги тўғрисидаги ҳужжатлар, фаолият тури ва жойининг солиқ тўғрисидаги қонун ҳужжатларига мувофиқлиги;
• солиқ тўловчига мулк ҳуқуқи асосида тегишли бўлган мол-мулк негизида, шунингдек, ушбу мол-мулкка эгалик қилиш ва (ёки) ундан фойдаланишга йўл қўядиган ўзга ашёвий ҳуқуқ асосида мол-мулкка ва ер участкаларига бўлган ҳуқуқни тасдиқловчи ҳужжатлар мавжудлиги.

Сайёр солиқ текшируви доирасида солиқ тўловчи — юридик шахслар ишчи-ходимларининг ҳақиқий сони ва солиқ ҳисоботида акс эттирилган ишчи-ходимлар сонига мувофиқлиги текшируви амалга оширилиши мумкин.

Сайёр солиқ текшируви доирасида уни амалга ошириш дастурида назарда тутилган ҳолатлар бўйича текширув ўтказилиши керак.