ДХХ Ўзбекистоннинг бир нечта вилоятида наркотиклар контрабандасига чек қўйди, деб хабар бермоқда ЎзА.

ДХХнинг Сурхондарё вилояти бўйича бошқармаси ходимлари томонидан ўтказилган тезкор тадборда Термиз туманида яшовчи, 1983 ва 1986 йилларда туғилган 2 нафар фуқаро 2 килограмм 60 грамм опий моддасини 40 минг долларга сотган вақтларида ДХХ ходимлари томонидан қўлга олинган.

Шунингдек, улар Тожикистондан келтирилган ушбу гиёҳвандлик воситасини Термиз шаҳрида истиқомат қилувчи, 1989 йилда туғилган фуқародан 28 минг долларга сотиб олгани аниқланиб, у ҳам ушланган.

ДХХ Сирдарё вилояти бўйича бошқармаси ходимлари ва Чегара қўшинлари ҳарбий хизматчилари ҳамкорлигида ўтказилган тезкор тадбирда Бекобод—Гулистон йўналишида ҳаракатланаётган Nexia Боёвут туманида тўхтатилиб, кўздан кечирилганда, унда йўловчи сифатида кетаётган, Тожикистон фуқароси бўлган шахс (1964 йилда туғилган) ёнида 1 килограмм опий гиёҳвандлик воситаси борлиги аниқланиб, тегишли тартибда расмийлаштириб олинган. Аниқланишича, у мазкур наркотикни Қозоғистонга ўтказишни режалаштирган.

Фарғона шаҳрида яшовчи, Тожикистон фуқароси (1988 йилда туғилган) эса ўзининг шаръий никоҳидаги турмуш ўртоғи бўлган, аёл (1992 йилда туғилган) билан Сурхондарё вилоятининг Денов туманига бориб, Тожикистондаги наркосавдогардан 11 минг долларга сотиб олинган 976 грамм опий ва 994 грамм гашиш гиёҳванд моддаларини контрабанда йўли билан мамлакатимиз ҳудудига ўтказади. Сўнгра улар наркотик моддаларни олиб қайтаётган вақтларида Марғилон шаҳрида ДХХ Фарғона вилояти бўйича бошқармаси ходимлари томонидан ушланган.

Бошқа ҳолатда эса Ёзёвон туманидан Марғилон шаҳри томон ҳаракатланаётган Lacetti тўхтатилиб, кўздан кечирилган. Натижада унда йўловчи сифатида кетаётган, Марғилон шаҳрида яшовчи, 1979 ва 1983 йилларда туғилган, муқаддам судланган 2 нафар фуқаронинг ёнида Қирғизистондан олиб келинган 698 грамм опий борлиги аниқланиб, процессуал тартибда расмийлаштириб олинган.

ДХХ Тошкент вилояти бўйича бошқармаси ҳамда вилоят божхона бошқармаси ходимлари томонидан Бекобод шаҳрида ўтказилган тезкор тадбирда эса Тожикистоннинг Сўғд вилояти Мастчоҳ туманида яшовчи, шахс (1977 йилда туғилган) 1 килограмм 961 грамм гашиш моддасини шартли харидорга сотган вақтида қўлга олинган.

Бу йўналишда ДХХ Наманган вилояти бўйича бошқармаси ходимлари томонидан ҳам вилоят божхона бошқармаси билан ҳамкорликда ўтказилган тезкор тадбирда Янгиқўрғон туманида ҳаракатланаётган Cobalt тўхтатилиб, текширувдан ўтказилган.

Натижада унда йўловчи сифатида кетаётган, Наманган шаҳрида яшовчи фуқаронинг (1966 йилда туғилган) ёнида 968 грамм гашиш борлиги аниқланган.

У мазкур наркотик моддани Қирғизистондаги танишидан 7 минг долларга сотиб олиб, учинчи шахслар имкониятлари орқали Янгиқўрғон тумани ҳудудига контрабанда йўли билан ўтказган.

Қайд этилишича, ҳозирда барча ҳолатлар юзасидан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.