Ўзбекистон ташқи ишлар вазири вазифасини бажарувчи Владимир Норов 2 август куни Ўзбекистон—Озарбайжон—Туркия мулоқот форматининг биринчи йиғилишида иштирок этиш учун келган Туркия ташқи ишлар вазири Мевлут Чавушоғлу билан учрашди.
ТИВ матбуот хизматининг хабар беришича, мулоқот чоғида ўзаро савдо ҳажмини ошириш, иқтисодиётнинг турли тармоқларида инвестиция лойиҳаларини амалга ошириш, маданий-гуманитар ва туризм алмашинувларини кенгайтириш юзасидан олий даражада эрилишилган келишувлар ижросига алоҳида эътибор қаратилди.
Ўзбекистон ва Туркиянинг халқаро институтлар доирасидаги ҳамкорликни ривожлантиришдан манфаатдорлиги таъкидланди.
Дунёдаги ва минтадаги вазият юзасидан фикр алмашилди. Туркия делегацияси Тошкент шаҳрида Афғонистон бўйича бўлиб ўтган конференция натижаларини юқори баҳолади. Афғонистон йўналишидаги саъй-ҳаракатларни мувофиқлаштиришни давом эттириш ва бу мамлакатга гуманитар ёрдам кўрсатишга икки томон ҳам тайёрлиги эътироф этилди.
Мевлут Чавушоғлу Тошкент шаҳрида ташқи сиёсат, савдо, иқтисодиёт ва транспорт масалалари учун масъул бўлган вазирликлар раҳбарлари иштирокида Ўзбекистон–Озарбайжон–Туркия мулоқотининг биринчи йиғилишини ўтказиш муҳим аҳамиятга эгалигини таъкидлади.
Икки ва кўп томонлама даражада режалаштирилган тадбирлар, шу жумладан, Самарқанддаги Туркий давлатлар ташкилоти саммитига тайёргарликнинг ташкилий жиҳатлари кўриб чиқилди.
Эслатиб ўтамиз, Тошкентда Ўзбекистон, Туркия ва Озарбайжон ташқи ишлар, савдо ҳамда транспорт вазирларининг уч томонлама учрашув кун тартибидан минтақалараро ҳамкорликни, инвестиция, инновация ва транспорт-коммунукация соҳаларидаги алоқаларни янада ривожлантириш масалалари ўрин олган.
Изоҳ (0)