Андижон ҳокимига биринчи ўринбосар тайинланди

Андижон вилояти ҳокими Шуҳрат Абдураҳмонов бугун, 1 август куни ўтказган ҳокимлик соатида Дилшодбек Каримовни ўзининг биринчи ўринбосари сифатида таништирди. Бу ҳақда «Дарё» мухбири Умиджон Мамарасулов хабар бермоқда.

Таъкидланишича, Иқтисодий тараққиёт ва камбағалликни қисқартириш вазирлигининг ҳудудларни комплекс ривожлантириш департаменти директори ўринбосари лавозимида ишлаган Дилшодбек Каримов вилоят ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари — вилоят иқтисодий тараққиёт ва камбағалликни қисқартириш бош бошқармаси бошлиғи лавозимига тайинланган.

Дилшодбек Каримов 1980 йилда Қўрғонтепа туманида туғилган бўлиб, 2005 йилда Андижон муҳандислик иқтисодиёт институтини, 2014 йилда Ўзбекистон Республикаси президенти ҳузуридаги Давлат бошқаруви академиясини тугатган.

Иш фаолиятини 2001 йилда Қўрғонтепа тумани халқ таълими бўлими ўқув услубиёт хонаси компьютер-оператори вазифасидан бошлаган. 2002—2021 йилларда Қўрғонтепа тумани «Бунёдкор» кичик корхонаси ҳисобчиси, туман иқтисодиёт бўлими 2-тоифали мутахассиси, бош мутахассиси, бўлими бошлиғи, Қўрғонтепа тумани ҳокимининг иқтисодиёт ва ижтимоий ривожлантириш масалалари бўйича ўринбосари, хизмат кўрсатиш соҳаси ва тадбиркорлик масалалари бўйича ўринбосари, Қўрғонтепа тумани ҳокимининг биринчи ўринбосари—Қорасув шаҳар ҳокими, Иқтисодиёт вазирлиги ҳудудларни ривожлантириш дастурларни мониторинг қилиш бўлими бош мутахассиси лавозимларида ишлаган.

Аввалроқ Шуҳрат Абдураҳмонов 2022 йилнинг 27 июнь куни ўтказилган ҳокимлик соатида Отабек Турсунов фаолиятида камчиликка йўл қўйгани ҳақида айтиб, эгаллаб турган лавозимидан олинганини маълум қилингани ҳақида хабар берилганди.

«Дарё»нинг вилоят ҳокимлигидаги манбаларига кўра, Турсуновнинг ишдан олинишига вилоятда оилавий тадбиркорликни ривожлантириш дастурлари доирасидаги муаммоли кредитлар қолдиғи юқорилиги, муаммоли кредитларни ундириш ва ажратилган кредитлардан самарали фойдаланишда камчиликларга йўл қўйилганлиги сабаб қилиб кўрсатилган.