Самарқандда «давлат ходими аёл кишини тепиб, ҳақоратлади» деган хабар тарқалди. Вилоят ИИБ ҳолатга аниқлик киритди

Ижтимоий тармоқларда «Самарқанддаги Farovon city stroy’нинг зўравонлари аҳолига куч ишлатиб, уйидан ҳайдаб чиқаряпти» сарлавҳали видео эълон қилинди. Вилоят ИИБ ахборот хизмати раҳбари Жаҳонгир Сагдуллаев ҳолатга муносабат билдирди.

Таъкидланишича, ҳозирги кунда Самарқанд шаҳар «Зарафшон» МФЙ ҳудудида Farovon city МЧЖ томонидан қурилиш ва бунёдкорлик ишлари олиб борилаётгани сабабли 37 та дала ҳовли эгасининг розилиги билан товон пуллари тўланиб, дала ҳовлилар бузилган.

Ушбу дала ҳовлилардан бирининг эгаси С.Ш. унга белгиланган товон пулларини олганлигига қарамасдан, хонадонни унга берилган муддатда бўшатмаган.

2022 йил 20 июль куни Farovon city МЧЖ раҳбари фуқарога яшаб турган манзилини тарк этишини, қурилиш ишлари давом эттирилиши лозимлигини, акс ҳолда белгиланган муддатда унга юклатилган қурилишни якунлай олмаслигини тушунтирган вақтида фуқаро С.Ш. ва МЧЖ раҳбари ҳамда унинг қўл остидаги ишчилари ўртасида жанжал юзага келган.

Ҳозирда ҳолат юзасидан терговга қадар текширув ҳаракатлари олиб борилмоқда.