Andijon viloyati hokimi Shuhrat Abdurahmonov bugun, 1-avgust kuni o‘tkazgan hokimlik soatida Dilshodbek Karimovni o‘zining birinchi o‘rinbosari sifatida tanishtirdi. Bu haqda “Daryo” muxbiri Umidjon Mamarasulov xabar bermoqda.
Ta’kidlanishicha, Iqtisodiy taraqqiyot va kambag‘allikni qisqartirish vazirligining hududlarni kompleks rivojlantirish departamenti direktori o‘rinbosari lavozimida ishlagan Dilshodbek Karimov viloyat hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari — viloyat iqtisodiy taraqqiyot va kambag‘allikni qisqartirish bosh boshqarmasi boshlig‘i lavozimiga tayinlangan.
Dilshodbek Karimov 1980-yilda Qo‘rg‘ontepa tumanida tug‘ilgan bo‘lib, 2005-yilda Andijon muhandislik iqtisodiyot institutini, 2014-yilda O‘zbekiston Respublikasi prezidenti huzuridagi Davlat boshqaruvi akademiyasini tugatgan.
Ish faoliyatini 2001-yilda Qo‘rg‘ontepa tumani xalq ta’limi bo‘limi o‘quv uslubiyot xonasi kompyuter-operatori vazifasidan boshlagan. 2002—2021-yillarda Qo‘rg‘ontepa tumani “Bunyodkor” kichik korxonasi hisobchisi, tuman iqtisodiyot bo‘limi 2-toifali mutaxassisi, bosh mutaxassisi, bo‘limi boshlig‘i, Qo‘rg‘ontepa tumani hokimining iqtisodiyot va ijtimoiy rivojlantirish masalalari bo‘yicha o‘rinbosari, xizmat ko‘rsatish sohasi va tadbirkorlik masalalari bo‘yicha o‘rinbosari, Qo‘rg‘ontepa tumani hokimining birinchi o‘rinbosari—Qorasuv shahar hokimi, Iqtisodiyot vazirligi hududlarni rivojlantirish dasturlarni monitoring qilish bo‘limi bosh mutaxassisi lavozimlarida ishlagan.
Avvalroq Shuhrat Abdurahmonov 2022-yilning 27-iyun kuni o‘tkazilgan hokimlik soatida Otabek Tursunov faoliyatida kamchilikka yo‘l qo‘ygani haqida aytib, egallab turgan lavozimidan olinganini ma’lum qilingani haqida xabar berilgandi.
“Daryo”ning viloyat hokimligidagi manbalariga ko‘ra, Tursunovning ishdan olinishiga viloyatda oilaviy tadbirkorlikni rivojlantirish dasturlari doirasidagi muammoli kreditlar qoldig‘i yuqoriligi, muammoli kreditlarni undirish va ajratilgan kreditlardan samarali foydalanishda kamchiliklarga yo‘l qo‘yilganligi sabab qilib ko‘rsatilgan.
Mavzuga doir: Qoraqalpog‘istonga yangi ichki ishlar vaziri tayinlandi
Izoh (0)