Андижон вилоятида ҳаваскор ёшлар ўртасида ўтказилган футбол мусобақасида иккинчи ўринни олган маҳалла ёшларига ярим миллиардлик спорт комплекси қуриб берилади. Бу ҳақда Андижон вилояти ҳокими Шуҳратбек Абдураҳмонов 28 июль куни маҳалла ёшлари ўртасида бўлиб ўтган футбол бўйича Ўзбекистон Давлат хавфсизлик хизмати кубогининг вилоят босқичи учрашувида айтиб ўтди, дея хабар бермоқда «Дарё» мухбири.
Футбол бўйича «ДХХ кубоги»нинг вилоят босқичида Андижон вилоятидаги 887 та маҳалла ёшлари ўз жамоалари билан иштирок этган. Финал учрашувда Андижон туманининг «Полосон» маҳалласи жамоаси Асака туманининг «Юксалиш» маҳалласи жамоаси устидан 2:1 ҳисобида ғалаба қозониб, вилоят чемпиони бўлди.
Мусобақа ғолибларини тақдирлаш маросимида иштирок этган вилоят ҳокими Шуҳратбек Абдураҳмонов иккинчи ўринни олган Асака тумани ёшларининг кўрсатган ўйини этироф этиб, уларнинг маҳалласида спорт майдони қуриб беришни ваъда қилган.
«Мен ҳам кўп футбол кўрганман, лекин бундай ўйинчиларни кўрмаганман.
Асака тумани жамоасидагиларнинг отасига минг раҳмат. Булар иккинчи ўринни олган бўлса ҳам, вилоят ҳокимини биринчи ўриндаги жамоаси бўлиб қолади. Уларнинг маҳалласига 500 миллион сўмлик спорт ўйингоҳини ўзим қуриб берман», — деди Шуҳрат Абдураҳмонов.
Андижон туманининг «Полосон» маҳалласи жамоаси вилоят номидан Республика босқичида иштирок этади.
Изоҳ (0)