Фарғона ва Тошкент вилоятларида дори савдоси билан ноқонуний шуғулланган шахслар қўлга олинди. Бу ҳақда Иқтисодий жиноятларга қарши курашиш департаменти ахборот хизмати хабар қилди.
Бош прокуратура ҳузуридаги департаментнинг Бектемир тумани бўлими томонидан текзор тадбир ўтказилган. Унда фуқаро Д.Н. ва бошқалар дори воситаларини дорихоналардан ташқарида муомалага киритиш орқали даромад орттиришни кўзлаб, фуқаро Б.га тегишли ҳужжатлари бўлмаган жами 1900 дона «Эндокард 50 мл» номли дори воситасини 133 миллион сўмга сотишга келишиб, 12 300 долларни олган вақтида ушланган.
Фуқаро О.Х. бошқарувидаги Ласетти автотранспорт воситаси кўздан кечирилганда Д.Н.га тегишли яна 10 дона «Эндокард 50 мл» номли ҳамда 58 дона «Серго 100 мл» номли дори воситалари мавжудлиги аниқланиб, ашёвий далил сифатида олинган.
Шу каби ҳолат Қўқон шаҳрида ҳам кузатилган. Ўтказилган тезкор тадбирда Тўққизбулоқ кўчасида истиқомат қилувчи фуқаро Ф.Н. яшаш хонадонида тегишли ҳужжатлари бўлмаган, хорижда ишлаб чиқарилган жами 420,9 миллион сўмлик 9 турдаги дори воситасини сотиш учун сақлаб келаётгани аниқланиб, ашёвий далил сифатида олинган.
Мазкур ҳолатлар юзасидан Жиноят кодексининг 186-3-моддаси (дори воситаларини ёки тиббий буюмларни дорихоналардан ва уларнинг филиалларидан ташқарида реализация қилиш) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)