“Ko‘p futbol ko‘rganman, lekin bunday o‘yinchilarni ko‘rmaganman” — Shuhrat Abdurahmonov futbol bo‘yicha “DXX kubogi” musobaqasi g‘oliblari haqida (video)

Andijon viloyatida havaskor yoshlar o‘rtasida o‘tkazilgan futbol musobaqasida ikkinchi o‘rinni olgan mahalla yoshlariga yarim milliardlik sport kompleksi qurib beriladi. Bu haqda Andijon viloyati hokimi Shuhratbek Abdurahmonov 28-iyul kuni mahalla yoshlari o‘rtasida bo‘lib o‘tgan futbol bo‘yicha O‘zbekiston Davlat xavfsizlik xizmati kubogining viloyat bosqichi uchrashuvida aytib o‘tdi, deya xabar bermoqda “Daryo” muxbiri.

Futbol bo‘yicha “DXX kubogi”ning viloyat bosqichida Andijon viloyatidagi 887 ta mahalla yoshlari o‘z jamoalari bilan ishtirok etgan. Final uchrashuvda Andijon tumanining “Poloson” mahallasi jamoasi Asaka tumanining “Yuksalish” mahallasi jamoasi ustidan 2:1 hisobida g‘alaba qozonib, viloyat chempioni bo‘ldi.

Musobaqa g‘oliblarini taqdirlash marosimida ishtirok etgan viloyat hokimi Shuhratbek Abdurahmonov ikkinchi o‘rinni olgan Asaka tumani yoshlarining ko‘rsatgan o‘yini etirof etib, ularning mahallasida sport maydoni qurib berishni va’da qilgan.

“Men ham ko‘p futbol ko‘rganman, lekin bunday o‘yinchilarni ko‘rmaganman.

Asaka tumani jamoasidagilarning otasiga ming rahmat. Bular ikkinchi o‘rinni olgan bo‘lsa ham, viloyat hokimini birinchi o‘rindagi jamoasi bo‘lib qoladi. Ularning mahallasiga 500 million so‘mlik sport o‘yingohini o‘zim qurib berman”, — dedi Shuhrat Abdurahmonov.

Andijon tumanining “Poloson” mahallasi jamoasi viloyat nomidan Respublika bosqichida ishtirok etadi.