ШҲТга аъзо давлатлар ўзаро савдоларда доллардан воз кечиш устида ишламоқда. Бу ҳақда Ўзбекистоннинг ШҲТ ишлари бўйича миллий кординатори Раҳматилло Нуримбетов маълум қилди, дея хабар бермоқда «Дарё» мухбири.
Бугун, 29 июль куни Тошкент шаҳрида Шанхай ҳамкорлик ташкилотига аъзо давлатлар ташқи ишлар вазирлари кенгашининг йиғилиши бўлиб ўтмоқда. Тадбир доирасида ташкилот расмий вакили Раҳматилло Нуримбетов журналистларга интервью берди. Хусусан, ШҲТга аъзо давлатлар ўртасидаги савдоларда доллардан воз кечиш истаги қай даражада экани сўралди. Мутахассис бу масалада ҳали бир қарорга келинмаганини айтди.
«Миллий валюталар орқали савдога босқичма-босқич ўтиш масаласи бугунги кунда юзага келган эмас. Бу мавзу айрим давлатлар томонидан бир неча йилдан бери кўтарилиб келинмоқда. Ҳозирча мазкур масалада якуний тўхтамга келинмаган. ШҲТда бу бўйича махсус режа устида иш олиб борилмоқда. Буни ишчи дастур десак бўлади. Ушбу дастур томонлар ва эспертлар ўртасида муҳокама қилинда давом этмоқда», – деди ташкилот расмийси.
Аввалроқ Тошкентда ШҲТга аъзо давлатлар ташқи ишлар вазирлари кенгаши йиғилиши бошлангани махлум қилинганди.
Изоҳ (0)