Олий Мажлис СенатидаХотин-қизларнинг жамиятдаги ролини ошириш, гендер тенглик ва оила масалалари бўйича республика комиссияси мажлиси бўлиб ўтди. Бу ҳақда ЎзА хабар қилди.
Қайд этилишича, хотин-қизларни ижтимоий ҳимоя қилиш мақсадида 12 минг хотин-қизни уй-жой билан таъминланиши керак эди. Лекин 500 дан сал ортиқ аёл уй-жой билан таъминланган, холос. «Аёллар дафтари»га киритилган хотин-қизларнинг уй-жойларни таъмирлаш ишлари бир фоизга ҳам бажарилмаган. Ёзнинг жазирама иссиқ кунларида 30 ёшдан ошган аёллар саёҳатларини ташкил этиш вазифаси қўйилган. Лекин бу ҳам амалда бажарилмаган.
Мажлисни кириш сўзи билан очган Сенат раиси, мазкур комиссия раиси Танзила Норбоева хотин-қизлар манфаатларини таъминлаш, уларнинг жамиятда тутган ўрнини яхшилаш, муаммоларини ҳал қилиш бўйича тизимли ишлар амалга оширилаётганини қайд этган. Сенат раиси хотин-қизлар ҳуқуқлари ҳимояси, айниқса аёлларга нисбатан зўравонлик ҳолатлари бўйича оммавий ахборот воситалари ходимлари самарали фаолият юритаётганини алоҳида таъкидлаган.
Ҳозирги кунда хотин-қизлар билан боғлиқ қонун ҳужжатлари, низомлар инвентаризациядан ўтказилмоқда. Шу билан бирга АҚШ, Европа, ва бошқа ривожланган давлатлар қонунчилиги ўрганиб чиқилган. Сенат раиси хотин-қизларнинг жамиятдаги ўрни яхшиланиши учун Давлатимиз раҳбари томонидан белгилаб берилган айрим ишлар бажарилмаётганини танқид қилган.
«Олима аёллар» тузилмаси ҳали ташкил этилмаган. Давлат бошқаруви академиясида ҳар йили камида юз нафар хотин-қизлар учун алоҳида ўқув курси ташкил этилиши белгиланган бўлса ҳам, бу ҳам амалда ҳали бажарилмаган. Хотин-қизлар рўйхати ҳатто ҳали шакллантирилмаган.
Хотин-қизлар билан бевосита иш олиб борувчи қуйи бўғинлар иши қониқарли эмас. Қуйи бўғинлар ишларини қоралайман. Бу йил президент топшириғи асосида 12 минг хотин-қизларни ижтимоий ҳимоя қилиш мақсадида уй-жой билан таъминланиши керак эди. Лекин 500 дан сал ортиқ аёл уй-жой билан таъминланган, холос. Бу борадаги режа ўн фоизга ҳам бажарилмаган. Президент қабул қилган ҳужжатнинг бажарилмаслигини қандай баҳолаш керак? Ҳужжатлар бажарилмаса, уларга ишонч қоладими? «Аёллар дафтари»га киритилган хотин-қизларнинг уй-жойларни таъмирлашга кўмаклашиш назарда тутилган. Бу эса бир фоизга ҳам бажарилмаган. Жойлардаги масъул тузилмалар эса топшириқларни бажариш ўрнига тадбирбозлик қилиб юрибди. Ёзнинг жазирама иссиқ кунларида 30 ёшдан ошган аёллар саёҳатларини ташкил этиш вазифаси ҳам қўйилган. Лекин бу ҳам амалда бажарилмаган, — дейди Танзила Норбоева.
Изоҳ (0)