Қандай қилиб минимал вақт сарфлаб, организмга максимал фойда келтириш мумкин? Бунинг ечимини кардио машқларидан топиш мумкин. У нафақат хотирани яхшилайди, балки соғлом уйқу билан ҳам таъминлайди, деб ёзади «Новий очаг».
Кардио — бу саломатлик. Дарҳақиқат, жисмоний машқлар нафақат вазнни назорат қилишда ёрдам беради, балки тери ҳолатини яхшилайди ва касалланиш эҳтимолини камайтиради. Шунингдек, мушакларнинг тонусини ошириб, соғлиқ учун фақат фойда келтиради. Қуйида кардио машғулотларни бошлашингизга туртки бўладиган 5 та сабаб билан танишиб чиқишингиз мумкин.
Хотирани яхшилайди
Жоржия технология институтининг янги тадқиқоти шуни кўрсатдики, атиги 20 дақиқа давомида тош кўтариш хотирани 10 фоизга яхшилайди. Олимларнинг фикрича, мушакларни сумкалар, гантеллар, тренажёрлар билан вақтинча таранглаштириш хотирани яхшилайдиган гормонлар ишлаб чиқаришни рағбатлантиради. Натижада кардио машқлардан сўнг баъзи маълумотларни эслаб қолиш уларнинг хотирада қолиш эҳтимолини оширади.
Соғлом уйқу
Аппалачиан Давлат Университети томонидан олиб борилган янги тадқиқот шуни кўрсатдики, кардио машқларини бажариш учун энг яхши вақт эрталаб, куннинг иккинчи ярмидан кейин ва кеч тушмасидан аввал. Олимларнинг аниқлашича, оғирлик билан машқ қилиш организмни иситади, бу эса ўз-ўзидан тунги уйқуга тайёрлайди. Бундан ташқари, кардио ва кучли машқлар комбинацияси тезроқ ухлаб қолишга ва кечаси яхши ухлашга ёрдам беради.
Метаболизм тезлашади
Доимий қарашлардан фарқли ўлароқ, жисмоний машқлар пайтида организмдаги ёғлар мушак массаси билан алмаштирилмайди. Қанчалик тез-тез тош ёки гантелл кўтарсангиз ва спорт билан шуғуллансангиз, мушаклар массаси шунчалик ортади, аммо бу ёғ ўрнини босмайди.
«Ёғдан қутулишнинг яна бир оддий усули — метаболизм тезлигини ошириш. Бунинг ягона йўли кўпроқ мушак массасининг ортишидир», — дейди овқатланиш бўйича директор Жаклин Лондон.
Ўзни яхши ҳис қилиш
Агар машаққатли машғулотдан кейин кайфият яхши бўлса, сиз ёлғиз эмассиз: машқ бутун организмда эндорфинларни чиқаради ва сизни бахтлироқ ҳолатга келтиради. Тадқиқотлар шуни кўрсатадики, кардио машқлари ташвишларни камайтиришга ва депрессия белгилари билан курашишга ёрдам беради.
Юрак касалликларидан ҳимоя қилади
Мушак массасининг озайиши, қариш ва жисмоний фаолликни камайтиришдан ташқари, гипертония, иккинчи тоифа қандли диабет ва юрак-қон томир муаммолари хавфини ошириши мумкин. Бироз кардио машқларини бажариш суяк соғлиқни яхшилайди ва ўз навбатида юрак-қон томир касалликлари хавфини камайтиради. Шунинг учун Америка Юрак ассоциацияси юрак хасталиги хавфини камайтиришнинг бир усули сифатида кардио машқларини тавсия этади.
Изоҳ (0)