Ўзбекистонда ички бозорда дон нархлари барқарорлигини таъминлаш мақсадида доннинг бир қисми 2022 йил июль—сентябрь ойларида биржа савдолари орқали график асосида сотилиши белгиланди. Бу ҳақда Қонунчилик палатасидаги йиғилишда маълумот берилди.
Олий Мажлис Қонунчилик палатасида қишлоқ хўжалиги вазири биринчи ўринбосари Ш.Тешаевнинг «Ўзбекистон Республикаси қишлоқ хўжалигини ривожлантиришнинг 2020—2030 йилларга мўлжалланган стратегияси бажарилиши бўйича амалга оширилаётган ишлар тўғрисида»ги ахбороти эшитилди.
Эшитувда қайд этилганидек, давлат раҳбарининг «Ғаллани етиштириш ва сотишда бозор тамойилини жорий этишнинг қўшимча чора-тадбирлари тўғрисида»ги қарори билан ғаллани сотиб олиш ва сотиш бозор нархлари асосида амалга оширилиши йўлга қўйилди. Хусусан, ички бозорда дон нархлари барқарорлигини таъминлаш мақсадида доннинг бир қисми 2022 йил июль—сентябрь ойларида биржа савдолари орқали график асосида сотилиши белгиланди.
Қайд этилганидек, озиқ-овқат хавфсизлиги ва ички истеъмолни сифатли қишлоқ хўжалиги маҳсулотлари билан кафолатли таъминлаш борасида 2022 йилнинг биринчи ярим йиллигида 4 миллион 499 минг гектар ерга экинлар экилди. Республикадаги қишлоқ хўжалиги корхоналарида 5,1 минг гектар майдонларда 2 912 та иссиқхона фаолият олиб бормоқда. Шундан, 876 гектар гидропоника усулида, 4,2 минг гектар тупроқда маҳсулот етиштиришга ихтисослаштирилган бўлиб, уларда 385 минг тонна маҳсулотлар етиштирилди.
Шунингдек, қулай агробизнес муҳитини ва қўшилган қиймат занжирини яратиш мақсадида 14 та пахта-тўқимачилик, 41 ғаллачилик, 103 мева-сабзавотчилик кластерлари фаолияти йўлга қўйилди. Бугунги кунда 134 та пахта-тўқимачилик, 198 та ғаллачилик, 249 та мева-сабзавотчилик, 43 та шоличилик, 9 та доривор ўсимликлар етиштирувчи кластерлар фаолият юритмоқда.
Изоҳ (0)