Андижонда ит ёш болалар олдида ваҳшийларча отиб кетилгани айтилмоқда (видео)

Андижон вилояти Улуғнор туманидаги маҳаллалардан бирида итлар милтиқ билан отиб кетилаётгани юзасидан Олий Мажлис Қонунчилик палатаси депутати Расул Кушербаевга мурожаат келиб тушди. Ҳолат бўйича «Меҳр ва Оқибат» ҳайвонларни муҳофаза қилиш жамияти ҳамда Telegram’даги «Ekolog.uz» каналида муносабат билдирилди.

Кушербаевга қилинган мурожаатга кўра, туманнинг «Оқ том» маҳалла фуқаролар йиғини ҳудудида уй ҳайвонлари рухсатсиз, одамлар олдида, ёш болалар кўз ўнгида ваҳшийларча отиб кетилмоқда.

Наҳотки ҳайвонларни ҳимоя қиладиган қўмитанинг ўзи одамлар олдида ваҳшийларча қурол кўтариб, уй ҳайвонларини отиб юради? Бу ерда ҳайвон милтиқ кўтарганми ёки уй ҳайвонларими? — дейилган унда.

Охирги ҳолат — кеча Андижон вилоятида ит ўққа тутилгани ва уй эгаларининг йиғлаётгани акс этган видеолавҳа Олий Мажлис Қонунчилик палатаси депутати Расул Кушербаев каналига жойлаштирилган ва бир зумда ҳайвонларни ҳимоя қилиш гуруҳлари орасида тарқалиб кетган. Жиззах, Андижон, Навоий, Тошкент шаҳри, Тошкент вилояти. Ноқонуний отишмалар географияси кундан кунга ортиб бормоқда.

Нега қуролли одамлар шаҳар-у қишлоқларимиз кўчаларида хотиржам юришмоқда? «Меҳр ва Оқибат» раҳбарияти Ички ишлар вазирлиги ва Андижон вилояти ИИБдан Улуғнор туманида итни отган шахсни топиб, унга нисбатан қонун ҳужжатларида белгиланган тартибда чора кўриб, қамоққа олишни сўрайди, — дейилган муносабатда.

Одамлар, хусусан, ёш болалар олдида итларни рухсатсиз, ваҳшийларча отишган. Бу ерда қайси ҳайвон милтиқ кўтарган аслида? Ҳайвонларга шафқатсиз муносабатда бўлганлик учун жавобгарлик бор қонунчиликда. «Оқ том» МФЙ профилактика инспектори ҳолатни ўрганиб, бу ишни қилганларга чора кўриши лозим. Биз ҳолат юзасидан тегишли ташкилотлардан муносабат кутиб қоламиз. Вилоят ИИБ ҳам ҳолатни назоратга олиши лозим, — дейилган хабарда.