Андижонда 45 ёшли тадбиркор ўз жонига қасд қилиб, вафот этгани ҳақида хабарлар тарқалганди. Бош прокуратура матбуот котиби ҳолат юзасидан «Дарё»га маълумот тақдим этди.
Унга кўра, 25 июль куни соат 16:40 да Шаҳрихон туманида яшаган 45 ёшли тадбиркор яшаш хонадони яқинида жойлашган, ўзига тегишли, атрофи девор билан ўралган мевали боғда ўз жонига қасд қилиб, вафот этган.
Ҳодиса юзасидан Шаҳрихон тумани прокуратураси томонидан терговга қадар текширув ҳаракатлари олиб борилмоқда.
Журналист Хуршид Далиевнинг ёзишича, бу тадбиркор Раҳмидин Мирзаев бўлиб, у «Рашмилк» ҳамда «Recosement» брендларининг асосчиси, Андижоннинг энг ташаббускор тадбиркори бўлган ва минглаб оилаларни иш билан таъминлаган.
Кечаги шумхабар шу эди. Кечадан бери шу ҳақда ўйладим. Тўғри, қазойи қадар ҳақиқат. Аммо жавобсиз саволлар ҳам кўп. Бу инсон билан кўп мулоқотда бўлганман. Ғоялари, режалари катта эди. Доим катта марралар ҳақида ўйларди. Сўнгги бор ўтган ҳафта Шўрчи туманидаги қурилиши бошланган масжидга ёрдам жўнатганда уларнинг ҳақларига ғойибона дуолар қилиб, эслагандик. Спортни яхши кўрарди. Таълимни ривожлантириш тарафдори эди. Ҳомийлик ишлари кўп эди. Бу инсон ҳақида билганларим шу. Аллоҳ раҳматига олсин. Оила аъзоларига сабр-у жамил берсин, — деган журналист ўз хабарида.
Изоҳ (0)