Ички ишлар вазирлиги фуқароларни Facebook’даги тотализатор рекламаларига алданиб қолмаслик юзасидан огоҳликка чақирди.
Маълум қилинишича, интернет мониторинги давомида, 2022 йилнинг 13 июлида Facebook ижтимоий тармоғида «Бизнес Узбеки» номли гуруҳда «отправлю любому эту сумму на пластик. Зачисление на счёт 31 000 000 сум» мазмунида хабар жойлаштирилгани аниқланди.
Ушбу хабарга 23 та лайк ва 1 та изоҳ қолдирилган, саҳифа яратувчиси ва фойдаланувчисини аниқлашнинг техник имконияти мавжуд эмас.
Ўрганиш давомида, мазкур хабар остида «Присоединяйтес!» номи билан мавжуд бўлган Telegram мессенжеридаги «Заработок в Узбекистане» каналига ўтилди.
Ушбу канал 10 март 2022 йилда яратилган, 3 847 нафар обуначиси бор, каналда 524 та фотосурат, 57 та видолавҳа, 150 та веб-манзил, 40 та аудио-хабар мавжуд, фақат админ (эгаси) рухсати билан кириш мумкин.
Telegram мессенжеридаги «3аработок в Узбекистане» каналида 70 га яқин видео ва аудио файллар ўрганиб чиқилганида, хорижий давлатлар фуқароларининг Parimatch номли тотализатор ўйинини ўйнаб, катта миқдорда пул ютиб олгани тўғрисида, рус тилида сўзлаган интервьюлари жойлаштирилгани маълум бўлди.
Маълумот учун, Пари-Матч букмекерлик компанияси 2018 йилда Россияда рўйхатдан ўтган, 2022 йил март ойидан унинг номи Paribet деб ўзгартирилган, унинг бир қанча сохта саҳифалари мавжуд бўлиб, улар орқали алдов йўллари билан фуқароларнинг маблағлари қўлга киритилмоқда.
Шунингдек, «Заработок в Узбекистане» номли каналда Пари-Матч букмекерлик компаниясининг сохта саҳифаларига йўналтирувчи ҳаволалар жойлаштирилган бўлиб, фойдаланувчилар уларга кирган вақтида тўғридан-тўғри рўйхатдан ўтиш (ҳеч бир тасдиқлаш коди сўралмайди) имконияти яратилади.
Фойдаланувчиларни тотализатор ўйинларига янада қизиқтириш мақсадида, ушбу сохта ресурслар томонидан 2 млн сўмдан 20 млн сўмгача маблағлар ўйин иштирокчиларига «бонус» сифатида берилаётгани кўрсатилади.
Мазкур тотализатор ўйинининг сохта саҳифаси орқали ўйин ўйнаш учун фойдаланувчилар томонидан ўзбек сўмида Uzcard ва Humo тўлов тизимлари орқали ҳар бир ставкага энг камида 50 минг сўм пул маблағларини тўлаш мумкин бўлади. Ўйин орқали иштирокчиларга 20 млн сўмдан 40 млн сўмгача бўлган маблағларни осонгина ютиб олиш тўғрисида ёлғон эълонлар жойлаштириб борилади.
Тотализатор ўйинидаги ютуқлар фойдаланувчининг саҳифасида онлайн шаклда кўриниб туради, бироқ уларни банк картасига ўтказиб олиш сўралганда, тизим томонидан фойдаланувчи саҳифаси автоматик равишда блокланади ёки унга ютуқ сифатида кўрсатилган пулларни олиш имконияти чеклаб қўйилади.
Ўтказилган тезкор-техник тадбирлар натижасида, Telegram мессенжеридаги «Заработок в Узбекистане» канали администратори сифатида фотосурати ва исми кўрсатилган шахс 1994 йил Тошкент вилоятида туғилган, Тошкент шаҳри Сергели туманида яшовчи П.Й. экани, аслида эса унинг ушбу ноқонуний каналга алоқаси йўқлиги, 2022 йил 11 майдан буён Сеулда (Жанубий Корея)да экани, мазкур Telegram канали эса Украина ҳудудидан туриб бошқарилаётгани аниқланди.
Изоҳ (0)