Фарғона вилояти Чимён қишлоғида ижарага берилган ерни сотмоқчи бўлган фуқаро ушланди.
2022 йил 18 июль куни Фарғона вилоят ИИБ бошлиғи номига фуқаро М.У. ариза билан мурожаат қилиб, унда Чимён қишлоғи ҳудудида жойлашган, 49 йил муддатга шартнома асосида фойдаланишга берилган 5 гектарлик боғдорчилик йўналишидаги фермер хўжалиги ер майдонидан 60 сотихини С. исмли шахс эгалик ҳуқуқисиз, ҳеч қандай ҳужжатларсиз 7 000 АҚШ долларига сотишини маълум қилганини билдирган. С. исмли шахсга нисбатан қонуний чора кўришни сўраган.
Мазкур ариза юзасидан 2022 йилнинг 18 июль куни Фарғона вилояти прокуратураси ҳамда Фарғона вилояти ИИБ ЖҚБ, Коррупция ва иқтисодий жиноятларга қарши курашиш бўлими ходимлари томонидан ўтказилган тезкор тадбир давомида, С.нинг укаси Р.Д. «Чимён» маҳалла ҳудудида аризачи М.У.дан кимёвий ишлов берилган 7 000 АҚШ доллари миқдоридаги пуллардан ўзаро келишиб 6300 АҚШ долларини олган вақтида далилий ашёлар билан ушланди.
Мазкур ҳолат юзасидан Фарғона тумани ИИБ ҳузуридаги тергов бўлими томонидан Жиноят кодексининг 168-моддаси 2-қисми «а» банди билан жиноят иши қўзғатилиб, тергов ҳаракатлари олиб борилмоқда.
Юқорида кўрсатилган жиноятни содир этган шахс беш йилгача озодликдан маҳрум қилиш билан жазоланиши мумкин.