Ichki ishlar vazirligi fuqarolarni Facebook’dagi totalizator reklamalariga aldanib qolmaslik yuzasidan ogohlikka chaqirdi.
Ma’lum qilinishicha, internet monitoringi davomida, 2022-yilning 13-iyulida Facebook ijtimoiy tarmog‘ida “Biznes Uzbeki” nomli guruhda “otpravlyu lyubomu etu summu na plastik. Zachisleniye na schyot 31 000 000 sum” mazmunida xabar joylashtirilgani aniqlandi.
Ushbu xabarga 23 ta layk va 1 ta izoh qoldirilgan, sahifa yaratuvchisi va foydalanuvchisini aniqlashning texnik imkoniyati mavjud emas.
O‘rganish davomida, mazkur xabar ostida “Prisoyedinyaytes!” nomi bilan mavjud bo‘lgan Telegram messenjeridagi “Zarabotok v Uzbekistane” kanaliga o‘tildi.
Ushbu kanal 10-mart 2022-yilda yaratilgan, 3 847 nafar obunachisi bor, kanalda 524 ta fotosurat, 57 ta vidolavha, 150 ta veb-manzil, 40 ta audio-xabar mavjud, faqat admin (egasi) ruxsati bilan kirish mumkin.
Telegram messenjeridagi “3arabotok v Uzbekistane” kanalida 70 ga yaqin video va audio fayllar o‘rganib chiqilganida, xorijiy davlatlar fuqarolarining Parimatch nomli totalizator o‘yinini o‘ynab, katta miqdorda pul yutib olgani to‘g‘risida, rus tilida so‘zlagan intervyulari joylashtirilgani ma’lum bo‘ldi.
Ma’lumot uchun, Pari-Match bukmekerlik kompaniyasi 2018-yilda Rossiyada ro‘yxatdan o‘tgan, 2022-yil mart oyidan uning nomi Paribet deb o‘zgartirilgan, uning bir qancha soxta sahifalari mavjud bo‘lib, ular orqali aldov yo‘llari bilan fuqarolarning mablag‘lari qo‘lga kiritilmoqda.
Shuningdek, “Zarabotok v Uzbekistane” nomli kanalda Pari-Match bukmekerlik kompaniyasining soxta sahifalariga yo‘naltiruvchi havolalar joylashtirilgan bo‘lib, foydalanuvchilar ularga kirgan vaqtida to‘g‘ridan to‘g‘ri ro‘yxatdan o‘tish (hech bir tasdiqlash kodi so‘ralmaydi) imkoniyati yaratiladi.
Foydalanuvchilarni totalizator o‘yinlariga yanada qiziqtirish maqsadida, ushbu soxta resurslar tomonidan 2 mln so‘mdan 20 mln so‘mgacha mablag‘lar o‘yin ishtirokchilariga “bonus” sifatida berilayotgani ko‘rsatiladi.
Mazkur totalizator o‘yinining soxta sahifasi orqali o‘yin o‘ynash uchun foydalanuvchilar tomonidan o‘zbek so‘mida Uzcard va Humo to‘lov tizimlari orqali har bir stavkaga eng kamida 50 ming so‘m pul mablag‘larini to‘lash mumkin bo‘ladi. O‘yin orqali ishtirokchilarga 20 mln so‘mdan 40 mln so‘mgacha bo‘lgan mablag‘larni osongina yutib olish to‘g‘risida yolg‘on e’lonlar joylashtirib boriladi.
Totalizator o‘yinidagi yutuqlar foydalanuvchining sahifasida onlayn shaklda ko‘rinib turadi, biroq ularni bank kartasiga o‘tkazib olish so‘ralganda, tizim tomonidan foydalanuvchi sahifasi avtomatik ravishda bloklanadi yoki unga yutuq sifatida ko‘rsatilgan pullarni olish imkoniyati cheklab qo‘yiladi.
O‘tkazilgan tezkor-texnik tadbirlar natijasida, Telegram messenjeridagi “Zarabotok v Uzbekistane” kanali administratori sifatida fotosurati va ismi ko‘rsatilgan shaxs 1994-yil Toshkent viloyatida tug‘ilgan, Toshkent shahri Sergeli tumanida yashovchi P.Y. ekani, aslida esa uning ushbu noqonuniy kanalga aloqasi yo‘qligi, 2022-yil 11-maydan buyon Seulda (Janubiy Koreya)da ekani, mazkur Telegram kanali esa Ukraina hududidan turib boshqarilayotgani aniqlandi.
Izoh (0)