Жорий йилнинг май ойигача бўлган 12 ой ичида Буюк Британиядаги 1 406 та ресторан банкротлик туфайли ёпилди. Кўрсаткич ўтган йилнинг шу даврига нисбатан 64 фоизга кўп. Бу ҳақда Guardian хабар бермоқда.
Ушбу ҳолатнинг сабабларини мутахассислар ходимларнинг етишмаслиги, шунингдек, яшаш нархининг кескин ошиши деб баҳолади.
Ресторан секторига босим кундан-кунга кучайиб бормоқда. Ҳукумат кўмаги туфайли пандемиядан зўрға ўтиб кетган ресторанлар энди инфляциянинг ўсиши, Brexit’дан кейинги ишчи кучи етишмаслиги каби янги муаммоларга дуч келмоқда, — деди UHY Hacker Young ҳамкори Питер Кубрик.
Ресторан ва пабларда малакали ишчилар етишмаяпти, чунки Brexit’дан кейинги чекловлар бошқа мамлакатлардан ходимлар ёллашни қийинлаштиради.
Кадрлар етишмаслигига пандемия ҳам катта таъсир ўтказган, чунки ўша даврда сезиларли қисқартиришлар бўлган.
UHY Hacker Youngнинг ҳисоб-китобларига кўра, 2022 йилнинг биринчи ярмида энг яхши 100 та рестораннинг йўқотишлари 800 миллион фунт стерлингга етган.
Изоҳ (0)