Фарғона вилояти Ўзбекистон туманида истиқомат қиладиган боғбон ва полиз маҳсулотларини етиштирувчи Юсуфжон Эргашев тарвузни ноодатий усулда — тик ҳолда мини фермада етиштирди. Бу ҳақда «Халқ сўзи online» нашридан маълум бўлди. 

Унинг сўзларига кўра, ушбу тажриба натижаларини тарвуз етиштириш учун кичик майдонлардан самарали фойдаланиш нуқтаи назаридан муваффақиятли деб ҳисоблаш мумкин. 

Юсуфжон Эргашев туманда мева-сабзавот етиштиришда ўзига хос инновацион ёндашувлари билан танилган. 

У оила аъзолари билан биргаликда ўзининг кичик томорқасидан фойдаланиб, доимий равишда турли ноу-хауларни қўллаш ёки юртдошларини бирор янгилик билан ажаблантиришга интилади.

Фермернинг навбатдаги тажрибаси тарвузни вертикал усулда кичик майдонларда етиштириш экани айтилган. 

Бу усул ёрдамида 20 сотих майдонни эгаллайдиган кўчатлар атиги 2 сотих ерда парваришланди. Дастлабки йилнинг ўзида ўртача 10 тонна ҳосил ва 30-35 миллион сўм даромад олишни кўзлаяпмиз, — дейди миришкор.

Юсуфжон Эргашевнинг сўзларига кўра, тарвуз етиштиришнинг бундай усули ер ресурсларидан фойдаланишда 10 баробар тежамкорликка эришишни таъминлайди, 1 гектар ердан олинадиган ҳосил эса 5 тоннани ташкил этади.

Бунинг учун бор-йўғи 1,5 миллион сўм харажат қилинди. Айтганча, оила аъзолари тажрибали агрономлар билан ҳамкорликда кўчатни маҳаллий биогумус ёрдамида озиқлантирди. Ҳосил пишгунча қадар икки марта минерал ўғитдан фойдаланилди.

Миришкор оила аъзолари билан келгуси йили янада эртароқ ва кўпроқ майдонда вертикал усулда тарвуз етиштириш ҳамда ушбу тажрибани оммалаштиришни режалаштирмоқда.