Энергетика вазирлиги Ўзбекистонда кузатилаётган аномал иссиқ кунларда электр тармоғида юкламаларнинг олдини олиш учун фуқароларга хонадонлар ва офисларга доир тавсиялар берди.
Қайд этилишича, ҳаво ҳароратининг кескин кўтарилиши оқибатида электр энергиясига бўлган талаб ҳам кескин ошган. Шу сабабли электр тармоқлари ва трансформатор пунктларида юклама ортиши ва тармоқда носозликлар келиб чиқиши мумкин.
Бундай аномал иссиқ кунларда электр тармоғида зўриқишларни олдини олиш учун хонадонларга ва офисларга қуйидагилар тавсия этилади:
- кондиционерлар ишлаётган хонада эшик ва деразаларни ёпиш;
- кондиционерни автоматик режимда ишлатиш;
- хонадон эгалари ҳамма хоналарда эмас, қуёшга тескари бўлган бир ёки икки хонада кондиционер ишлатиб, ўша хоналарда бўлишлари;
- куннинг иссиқ пайтида (соат 12:00 дан соат 20:00 гача) имкон қадар бошқа хўжалик электр буюмлари (электр чойнак, дазмол, чанг юткич, микротўлқин ускуна, кир ва идиш ювиш машиналари)ни ишлатмаслик;
- музлаткични қуёш тушмайдиган жойда, деворлардан камида 15 см масофа узоқликда ушлаш;
- бинонинг қуёш тушадиган тарафидаги деразалар ташқарисидан, хоналарга қуёш тушишини чекловчи матоли ё бошқа материаллардан тўсиқлар қўйиш (шунда қуёш хона ичини эмас, ташқаридаги материални қиздиради. Хона салқинроқ бўлади);
- дўконлар, электр сарфини камайтириш мақсадида, музлаткичларнинг ташқи қурилмаларини дўкон ташқарисига жойлаштиришлари таклиф қилинади. Шунда дўкон ичида кераксиз иссиқлик ҳосил бўлмайди ва дўконни совитувчи кондиционерлар ортиқча электр истеъмол қилмайди;
- ҳар бир хонадон, уй, офис ва дўкон шу муҳофаза чораларини кўрса, ўша ҳудуддаги трансформатор юкламасининг ортишининг эҳтимоли камаяди.
Изоҳ (0)