Италия бош вазири Марио Драги мамлакат президенти Сержо Маттареллага ўз истеъфоси ҳақидаги сўровни иккинчи марта топширди, деб хабар бермоқда Reuters.
Президент идорасининг хабар қилишича, Маттарелла унинг истеъфосини «эътиборга олган» ва Драгидан вақтинчалик бош вазир лавозимида қолишни сўраган.
Маттарелла буёғига нима қилмоқчилиги ҳозирча номаълум. Reuters агентлигининг манбаларга таяниб, хабар беришича, Италия президенти парламентни тарқатиб юбориши ва октябрь ойида муддатидан олдин сайловлар ўтказиши мумкин.
Бир ҳафта олдин, 14 июль куни Марио Драги Италия ҳукуматини қўллаб-қувватловчи парламентнинг ҳукмрон коалициясида бўлиниш юз бергани туфайли истеъфога чиқишини маълум қилганди. Ўшанда Сержо Маттарелла истеъфони қабул қилишдан бош тортди ва Драгидан парламентда унинг ҳукумати 2023 йил бошига қадар барқарор кўпчиликка умид қила оладими ёки йўқлигини аниқлашни сўради.
Парламент коалициясида узил-кесил бўлиниш 20 июль куни, Драгининг учта асосий ҳамкори у чақирган ишонч вотумини рад этиши ортидан юз берди.
Марио Драги 2021 йилнинг февралида Италия бош вазири лавозимини эгаллаган. Украинада уруш бошланганидан сўнг, у Киевни фаол қўллаб-қувватловчи Европа лидерларидан бирига айланди.
Июнь ойида Италия парламентидаги энг йирик партия – ҳукмрон коалиция таркибига кирувчи «Беш юлдуз ҳаракати»да бўлиниш юз берди. Бу Украинага қурол етказиб бериш масаласи билан бевосита боғлиқ эди. Хусусан, партия қурол етказиб беришни қўллаб-қувватлашдан бош тортгани учун Италия ташқи ишлар вазири Луижи Ди Майо ундан чиқиб кетди.
Изоҳ (0)