Тўртта халқ артисти ўтолмаган кастингдан ўтган жисмоний тарбия ўқитувчиси. Шуҳрат Аббосовнинг «Деҳқонқул»и Аъзам Шокиржоновга қандай насиб этган эди (видео)

«Отамдан қолган далалар» фильми Шуҳрат Аббосов ижодида ҳам, ўзбек кино оламида ҳам дурдона асар ҳисобланади.

Фильмдаги бош қаҳрамон Деҳқонқул образини ким гавдалантириши борасида катта кино кастинг жараёнлари бўлиб ўтган.

Ўша вақтда жисмоний тарбия фани ўқитувчиси бўлган Аъзам Шокиржонов Деҳқонқул образига тасдиқланиш тарихи ҳақида «Дарё» мухбири Феруз Муҳаммадга берган интервьюсида гапириб берди.

Мен ўйлайман балким бу шахсга тегиш бўлиб қоладими, хуллас тўртта халқ артисти мен билан биргаликда ушбу фильмнинг кастингига келган. Улар Ўзбекистон халқ артистлари Ёдгор Саъдиев, Эркин Комилов, Мурод Ражабов, Рустам Сагдуллаевлар эди.

«Шундай халқ артистларининг олдида кастингдан қандай ёриб ўтдим экан», деб ўзимга савол бераман. Бу режиссёрнинг усталиги деб ўйлайман. Режиссёр хоҳласа сизни шунақа усталик билан образга киритиб қўяр экан, ҳозир ҳам ўша фильмни кўрсам, «шу ролни наҳотки мен ўйнаганман», деб йиғлайман.

Шуҳрат Аббосов «бу ерда бундай ҳаракат, бу эпизодда бунақа важоҳат, бунақа мимика», деб турган. Бу фильмнинг тагида барибир ҳам режиссёрнинг усталиги ётади. Кўп режиссёрлар ҳозир ҳам актёрнинг кучидан фойдаланиб фильм қилади. Шуҳрат акадек актёрни образга кирита оладиган режиссёр кўрмадим. Улар ҳаққоний режиссёр, метр, профессор, академик десак ҳам бўлади. Мен оддий жисмоний тарбия ўқитувчисиман. Улар мен орқали шунчалик катта бир образ яратган.

Шуҳрат Аббосов таниқли инсонлар билан эмас, танилмаган инсонлар билан ишлаган, Шуҳрат ака билан ишлаганлар машҳур бўлиб кетаверган. Масалан, «Ҳамза» фильмигача Ўлмас Алихўжаев машҳур эмас эди. Аммо фильмда қанақа зўр ўйнаб қўйган.

Албатта бу Шуҳрат Аббосовнинг кўп китоб ўқиганидан далолатдир. Афсус, афсус шундай инсонни 19 йил кинодан четлатиб қўйишдида, бўлмаса яна жуда кўп зўр фильмлар қоларди ундан.

Аъзам Шокиржонов, Ўзбекистонда хизмат кўрсатган мураббий, доцент