Кўпчилик машҳур кино юлдузи бўлишни орзу қилади. Улар худди севимли актёрлари каби шон-шуҳратдан завқланишни ва катта пул ишлашни хоҳлашади. Аммо Голливуддаги гўзал ҳаёт ортида у ерга бориш учун кўп нарсаларни қурбон қилишга мажбур бўлган оддий инсонлар борлигини унутамиз. Машҳурлик фақат меҳнат, интизом ва сабр-тоқат ортидангина келишини қуйидаги ҳикоя ҳам исботлайди.
Тоби Магуайр номи билан машҳур Тобиас Винсент Магуайр 1975 йилда туғилган. Унинг ота-онаси жуда ёш турмуш қурган. 18 ёшли онаси Венди Браун реклама соҳасида ишлаш билан бир қаторда актриса бўлишга бир неча бор ҳаракат қилган, 20 ёшли отаси Винсент Магуайр эса ошпаз эди. Тоби 2 ёшга тўлганда, ота-онаси ажрашиб кетади.
Шундан сўнг ҳаёт янада қийинлашади. Актёр интервьюларидан бирида шундай деб эслайди: «Бошпанамиз бўлса-да, лекин доим қариндошларим билан диванда ухлардим. Оилам давлат томонидан бериладиган озиқ-овқат талони ва тиббий суғурта ҳисобига кун кўрарди. Менга бундай ҳаёт ёқмасди, шунинг учун биринчи галда пул ишлаб топишни истаганман».
Шубҳасиз, асосий ҳаракатлантирувчи куч пул эди, шунинг учун актёр отасининг изидан боришни хоҳлайди. Ошпаз бўлиш тезда пул топиш учун ечим бўлган бўлиши мумкин, лекин Тобининг онаси уни актёрлик дарсларига бориши учун 100 доллар беради. Айнан шу қарор унинг ҳаётини бутунлай ўзгартириб юборади.
Актёрликни ўрганишни бошлаганида у 12 ёшда эди. Аввалига у бир нечта реклама роликларида суратга тушади, кейинчалик телесериалларда кичик ролларни ўйнайди. Аммо актёр шунчаки ўтириб, мўъжиза содир бўлишини кутишни хоҳламайди. «Гап нафақат имкониятларда, балки уларга бўлган муносабатда ҳам. Мен ўзингиз учун бошқа келажакни тасаввур қилиш қобилияти ҳақида гапиряпман», — дейди актёр.
Ҳар куни ой охиригача яшаш учун пулингиз етиш-етмаслиги ҳақида ўйлашингиз керак бўлганда, миянгизда шу нарса тинмай айланаверади. Магуайр буни шундай деб тушунтиради: «Бундай шароитда яшаётганингизда, мия фақат бугун одатдагидек овқатланиш ёки ижара ҳақини қандай тўлаш кераклиги ҳақида ўйлайди. Агар бу ҳақда ҳар куни ташвишланишингиз шарт бўлмаса, онгингиз муҳимроқ нарсалар учун бўшайди».
Вақт ўтди ва Тоби шоу-бизнесда мустаҳкам карьера қурди. У 1993 йилда «Бир ўсмирнинг ҳаёти» фильмида Роберт Де Ниро ва Леонардо Ди Каприо билан бирга рол ўйнашга муваффақ бўлди. 1997 йилда у «Музли шамол» фильмининг актёрлар таркибига кирди ва 2000 йилда Майкл Дуглас ва кичик Роберт Дауни билан бирга «Даҳолар» фильмида рол ўйнади.
Қийинчиликлар ўтмишда қолди. «Тасаввур ҳақиқатга, инфратузилмага ёки статистикага боғлиқ эмас. Менимча, бизнинг ҳаётимиз тасаввуримиз маҳсулидир», — деб тан олади актёр.
Тоби Магуайрнинг ҳаёти 2002 йилда бутун дунё олдида 4 миллион долларлик фильмда ўргимчак одам ролини ўйнаганида ўзгарди. 2003 йилда у «Севимли» фильмида рол ўйнади ва бунинг учун у яна 12 миллион доллар даромад олди.
«Биринчи марта муваффақиятга эришганимда пулимга жуда эҳтиёт бўлганман. Албатта, ўтмишнинг ҳам таъсири бор эди. Катта миқдордаги пул ютиб, кейин бир ой ичида уни йўқотадиган лотерея ғолибларини биласизми? Бу мен ҳақимда эмасди. Келажакда харажатларим кўп бўлганидан тўхтовсиз суратга тушишни истамасдим», — деб тан олади актёр.
Тобининг карьерасида Питер Паркер роли қанчалик муҳим бўлганига шубҳа йўқ. Магуайр ўргимчак одам ролини ўйнаган энг кўп маош олган актёрдир. У 17,5 миллион доллар ва «Ўргимчак одам-2» фильмининг 5 фоизини ва «Ўргимчак одам-3» фильмининг чиқишидан 15 миллион доллар ва 7,5 фоиз даромад олди.
Аммо муваффақиятга эришиш учун фақат орзу қилишнинг ўзи етарли эмас, кўп меҳнат қилиш ҳам керак. «Агар мен ҳақиқатан ҳам бирор нарсани хоҳласам, режа тузаман ва нима бўлишидан қатъи назар, ўша нарсага эришмагунимча тинмай ишлайман», — дейди Магуайр.
2021 йилда биз Тоби Магуайрни «Ўргимчак одам: Уйга йўл йўқ» фильмида ўргимчак одам сифатида Marvel оламига қайтганини кўрдик. Актёр бошқа образларни ҳам ижро этган. Ташқи кўринишдаги ўзгаришлар ва актёрлик маҳорати унинг суратга олиш майдончасидаги профессионаллиги ҳақида гапиради, веганизм ва ёга билан шуғулланиши эса кундалик ҳаётда фидойи ва қатъиятлилигидан дарака беради.
2023 йилда «Бобил» фильмининг премьераси бўлиб ўтади, унда Тоби Чарльз Чаплин ролини ижро этади.
Актёр ўз ижоди орқали чин юракдан ниманидир хоҳласангиз ва унга эришиш учун ҳаракат қилсангиз, ҳаёт сизни охир-оқибат мукофотлашини ўз ҳаёти мисолида исботлади.
Изоҳ (0)