«Толибон» Афғонистондан Ўзбекистонга снаряд отганларни қўлга олиб, жазолашини билдиргани яхши янгилик. Бу ҳақда сиёсатшунос Камолиддин Раббимов Telegram'даги каналида пост қолдирди.
Камолиддин Раббимовнинг ёзишича, бу ҳолат «Толибон» ҳаракатининг масъулиятли қўшни бўлиш ниятида эканини англатади.
«Яқинда толиблар Тошкентга келиб, музокалалар ўтказиб, қайтиши билан Афғонистон томонидан Ўзбекистон ҳудудига бешта снарядсиз ракеталар отилганди. Мен «толиблар музокаралардан норози бўлиб кеттимикин», деб хаёл қилган эдим. Биринчидан, ракеталар толибларни қайтиши биланоқ отилганди. Иккинчидан, ракеталар снарядсиз бўлганлиги «бу шунчаки сигнал, ичида бомбаси бўлса борми», дегандек мужда берарди...
Лекин толиблар «биз айбдорларни топамиз ва қаттиқ жазолаймиз» дейиши, вазиятни юмшатганди. Бугун эса толиблар «ҳужумларни уюштирган гуруҳ вакилларини» қўлган олганлигини, жазолашини билдирибди. Бу яхши янгилик. Бу билан «Толибон» ҳаракати «биз бундай фикрламаймиз, биз бундай қилмаймиз – биз масъулиятли қўшни бўлиш ниятидамиз», демоқда.
Ракеталарни аслида ким отганлиги ҳам муҳим. Лекин ундан муҳими, «Толибон» ҳаракати коллектив масъулиятни ўзига олмади, ўзидан соқит қилди ва ўзининг ичидаги радикал қанотга «биз бунақа аҳмоқона йўл тутмаймиз», деган позицияни сингдирди», – деб ёзган сиёсатшунос.
Аввалроқ Афғонистондан Ўзбекистонга снаряд отганлар ушлангани хабар қилинганди. Унга кўра, жиноий гуруҳнинг 3 нафар аъзоси ўлдирилгани, 5 нафари тириклайин қўлга олингани билдирилган.
Изоҳ (0)