Ўзбекистондан Россия Федерациясининг Москва, Қозон ва Санкт-Петербург шаҳарларига мунтазам автобус қатновлари 18 июлдан қайта тикланмоқда, деб хабар беради Транспорт вазирлиги.
Қайд этилишича, мазкур йўналишларда қатновлар Uzautotrans service МЧЖ корхонасининг Yutong русумли автобусларида амалга оширилади.
18 июлдан бошлаб, ҳафтанинг душанба ва пайшанба кунлари «Тошкент» автовокзалидан соат 12:00 да Тошкент—Москва йўналишида қатновлар амалга оширилади. Мазкур йўналишда чипта нархи — 1 миллион сўм;
Тошкент—Қозон йўналишида қатновлар ҳафтанинг сешанба ва жума кунлари бажарилади. Автобуслар «Тошкент» автовокзалидан соат 11:00 да ҳаракатланишни бошлайди. Чипта нархи — 800 минг сўм;
Тошкент—Санкт-Петербург йўналишида қатновлар ҳафтанинг чоршанба ва шанба кунлари бажарилади. Автобуслар «Тошкент» автовокзалидан соат 16:00 да йўналиш бўйлаб ҳаракатланишни бошлайди. Чипта нархи — 1 миллион 250 минг сўм.
Аввалроқ Тошкент шаҳридан қўшни давлатлардаги бир қанча вилоятларга халқаро рейс 11 апрелдан тажриба сифатида йўлга қўйилганди. Хусусан, «Тошкент» автовокзалидан Тошкент—Қизил Ўрда йўналишига соат 17:00 дан, Тошкент—Олмаота йўналишига соат 18:00 дан тажриба сифатида рейслар очилган. 15 апрелдан эса Тошкент—Бишкек йўналишида автобус қатновлари қайта йўлга қўйилган.
Изоҳ (0)