Тиш пастаси тирноқлар ҳолатини яхшилаши ростми?

Одатда аёллар тиш пастасидан бошқа мақсадларда ҳам фойдаланади. Баъзилар иложи борича тезроқ қутилиш умидида уни ҳуснбузар тошганда қўллайди. Бироқ мутахассислар ушбу усулидан фойдаланишни маслаҳат бермайди, чунки восита яллиғланган жойларга салбий таъсир қилади. Аммо яқинда янги гўзаллик концепцияси пайдо бўлди, унга риоя қилганлар тиш пастаси тирноқларнинг ҳолатини яхшилашига ишонмоқда. Ҳақиқатан ҳам шундайми? Grazia нашри ушбу саволга жавоб излади.

Аёллар тирноқ пластинкасига оддий тиш пастасини қўллайди ва 2-3 дақиқадан сўнг уни илиқ сув билан ювиб ташлайди. Ушбу процедура гўё тирноқларнинг ўсишини тезлаштиради ва уларни мустаҳкамлайди. Ҳозирги вақтда ушбу маълумотни тасдиқловчи илмий тадқиқотлар мавжуд эмас, аммо мутахассислар паста таркибини таҳлил қилиб, ушбу восита чиндан ҳам фойдали бўлиши мумкинлигини тахмин қилди.

Баъзи тиш пасталарида истеъмол содаси мавжуд бўлиб, у нафақат тишларни, балки тирноқларни ҳам самарали оқартиради. Бундан ташқари, тирноқ атрофида қолган ҳар қандай лакни олиб ташлашга ёрдам беради. Аммо тери таъсирчан бўлса, унда тажриба ўтказмаслик ва махсус воситадан фойдаланмаган яхшироқ, чунки қизариш ва ачишиш ҳисси пайдо бўлиши мумкин.

Тиш пастасида кальций, баъзиларида эса кремний диоксиди мавжуд бўлиб, иккаласи ҳам тирноқларнинг саломатлиги ва ўсишига ҳисса қўшади. Шунга қарамай, мутахассислар тирноқлар учун махсус мўлжалланган гўзаллик воситаларидан фойдаланишни тавсия этади. Аммо ушбу ғайриоддий процедурани синаб кўришга қарор қилсангиз, ўзгаришларни диққат билан кузатиб боринг. Агар ноқулайлик туғилса, дарҳол тиш пастасини ювиб ташлаш керак.