Турмуш тарзи, генетика ва овқатланиш юрак саломатлигига таъсир қилмай қолмайди ва юрак хуружи хавфини сезиларли даражада ошириши ёки камайтириши мумкин. Аммо юракнинг соғлиғига таъсир қилувчи яна бир омил бор — бу юқумли касалликлар. Шифокорлар огоҳлантиришича, агар беморда айрим юқумли касалликлар бўлса, юрак саломатлигига кўпроқ қайғуриш керак, деб, ёзади «Новий очаг».
Инфекциялар юракка қандай алоқаси бор?
Кардиологларнинг фикрига кўра, инфекциялар юрак соғлиғига икки жиҳатдан путур етказиши мумкин. Биринчидан, стресс ёрдамида: юқумли касалликлар ҳар доим организмни янада интенсив режимда ишлашга мажбур қилади ва агар юрак заифлашган бўлса, бу кучайган стресс ҳужумни қўзғатиш учун етарли бўлиши мумкин. Иккинчидан, инфекция организмда яллиғланиш жараёнини келтириб чиқаради ва бу, ўз навбатида, томирларда зарарли қуйқалар шаклланишини тезлаштириши ва қон айланишининг қийинлашишига олиб келади.
Грипп
Грипп инфаркт ва инсульт хавфини сезиларли даражада оширадиган касалликлардан биридир. Лондон Гигиена ва тропик тиббиёт мактаби томонидан олиб борилган тадқиқот шуни кўрсатдики, ташхис қўйилгандан кейинги дастлабки кунларда хавф кескин ошади. Бироқ, эмлаш хавфни камайтиришга ёрдам беради ва организмни нафақат гриппдан, балки юрак хуружидан ҳам ҳимоя қилади.
Бронхит
New England Journal оф Medicine’да чоп этилган тадқиқотга кўра, бу нафас олиш йўллари инфекцияси юрак хуружи хавфини беш баробарга, инсультни эса уч баравар оширади. Энг хавфли давр — ташхис қўйилгандан кейинги дастлабки кунлар, аммо тикланишдан кейин уч ой ичида у аста-секин йўқолади. Шундай қилиб, бронхит билан оғриган беморлар тузалгандан кейин камида уч ой давомида юрак саломатлигига эҳтиёт бўлиш лозим.
Пневмония
Европа Профилактик Кардиология журналида чоп этилган тадқиқотга кўра, пневмония билан касалхонага ётқизилган одамларда юрак хуружи хавфи олти баробарга ортади. Энг ёмони шундаки, ортиб бораётган хавф касалхонага ётқизилганидан кейин камида беш йил давом этади. Шунинг учун пневмонияга чалинганлар юрак муаммоларининг дастлабки белгиларини ўтказиб юбормаслик учун кўпроқ эҳтиёт бўлиши керак.
Пешоб чиқариш йўллари инфекциялари (УТИ)
Деярли 35 000 беморни қамраб олган тадқиқот пешоб йўллари инфекциялари ва юрак хуружи ҳамда инсульт хавфи ўртасида тўғридан-тўғри боғлиқликни тасдиқлади.
Сепсис
Қон заҳарланиши билан оғриган беморларда тўлиқ тузалиб кетганидан кейин ҳам узоқ вақт давомида юрак хасталиги ва инсульт хавфи юқори бўлиб қолади. Гап шундаки, сепсис тизимли яллиғланишни келтириб чиқаради, бу инфекция даволангандан кейин узоқ вақт давомида организмда сақланиб қолади ва инсульт ёки юрак хуружи ривожланишига олиб келиши мумкин.
Оғиз бўшлиғи инфекциялари
Тишларнинг саломатлиги юрак соғлиғига бевосита боғлиқ: тиш касалликлари, гингивит ва периодонтит юрак касалликларини ривожланиш хавфини сезиларли даражада оширади. Тиш шифокорига йилига икки марта ташриф буюриш ва оғиз бўшлиғи гигиенаси қоидаларига риоя қилиш орқали нафақат тишларни, балки юракни ҳам ҳимоя қилиш мумкин.
Изоҳ (0)