«Украина ЛХР ва ДХРнинг тан олинишини қоралашга ҳақли эмас» — Шимолий Корея ТИВ

Украина ҳукумати «КХДР суверенитети қонуний намоён қилиниши» — унинг Донецк ва Луганск халқ республикаларини тан олишига эътироз билдириш учун «ҳуқуқ ва малакага» эга эмас. Бу ҳақда Шимолий Корея ташқи ишлар вазирлиги маълум қилди, дея хабар бермоқда Корея марказий ахборот агентлиги.

Хабарда Украина илгари «халқаро муносабатларда беғаразлик ва адолат тамойилларига зид хатти-ҳаракатлар қилгани», Американинг КХДРга нисбатан «душманлик сиёсати»га қўшилгани таъкидланган.

Пхеньян унинг суверенитетини ҳурмат қиладиган ва унга дўстона муносабатда бўлган барча дунё давлатлари билан алоқаларни ривожлантиради, дейилади вазирлик баёнотда.

Шимолий Корея 13 июль куни ДХР ва ЛХР мустақиллигини тан олди. Пхеньян Донбасс республикалари билан дўстона муносабатларни ривожлантиришга тайёрлигини маълум қилди.

Украина «бундай дўстона бўлмаган ҳаракат»га жавобан КХДР билан дипломатик муносабатларни узди. Украина президенти Владимир Зеленский Шимолий Кореянинг ЛХР ва ДХР мустақиллигини тан олишига қаттиқ жавоб беришни ваъда қилди.

Россия февраль ойида ДХР ва ЛХР мустақиллигини тан олган эди. Кейин Сурия, ўзи қисман тан олинган Абхазия ва Жанубий Осетия каби давлатлар Россия ортидан эргашди.