Самарқандда қарздорлиги мавжуд 396 нафар киши ва 75 та транспорт воситасига қидирув эълон қилинган

МИБнинг Самарқанд вилояти бошқармаси қидирув шўъбаси томонидан жорий йилнинг биринчи чорагида жами 396 нафар шахсга нисбатан қидирув олиб борилиб, 297 нафари топилган. Бу ҳақда «Дарё»га бошқарманинг қидирув шўъбаси катта инспектори Илҳом Маллаев маълум қилди.

Қайд этилишича, 99 нафар қидирувдаги шахснинг 41 нафари чет элда бўлиб, 58 нафари маҳаллий даражада қидирилмоқда.

«Ўтган йилнинг мос даврида эса жами 311 нафар қидирувдаги шахсларга нисбатан қидирув тадбирлари олиб борилган. Шундан 218 нафари топилган. 93 нафар қидирувдаги шахсларнинг 64 нафари чет элда, 29 нафари маҳаллий даражада қидирилган. Мазкур йилда қидирувдаги шахсларнинг топилиш кўрсаткичи ўтган йилнинг мос даврига нисбатан беш фоизга ўсган», — дейди Илҳом Маллаев.

Маълумот берилишича, 2022 йилнинг биринчи ярим йиллигида жами 75 та автотранспорт воситасига нисбатан қидирув тадбирлари олиб борилиб, шундан 50 таси топилган. Қолган 25 таси бўйича қидирув тадбирлари олиб борилмоқда. Ўтган йилнинг мос даврида эса жами 90 та автотранспорт воситаларига нисбатан қидирув тадбирлари олиб борилган. Шундан 70 таси топилиб, 20 таси ҳозир ҳам қидирилмоқда. Қидирувдаги автотранспорт воситаларининг топилиш кўрсаткичи ўтган йилнинг мос даврига нисбатан 11 фоизга камайган.