Samarqandda qarzdorligi mavjud 396 nafar kishi va 75 ta transport vositasiga qidiruv e’lon qilingan

MIBning Samarqand viloyati boshqarmasi qidiruv sho‘basi tomonidan joriy yilning birinchi choragida jami 396 nafar shaxsga nisbatan qidiruv olib borilib, 297 nafari topilgan. Bu haqda “Daryo”ga boshqarmaning qidiruv sho‘basi katta inspektori Ilhom Mallayev ma’lum qildi.

Qayd etilishicha, 99 nafar qidiruvdagi shaxsning 41 nafari chet elda bo‘lib, 58 nafari mahalliy darajada qidirilmoqda.

“O‘tgan yilning mos davrida esa jami 311 nafar qidiruvdagi shaxslarga nisbatan qidiruv tadbirlari olib borilgan. Shundan 218 nafari topilgan. 93 nafar qidiruvdagi shaxslarning 64 nafari chet elda, 29 nafari mahalliy darajada qidirilgan. Mazkur yilda qidiruvdagi shaxslarning topilish ko‘rsatkichi o‘tgan yilning mos davriga nisbatan besh foizga o‘sgan”, — deydi Ilhom Mallayev.

Ma’lumot berilishicha, 2022-yilning birinchi yarim yilligida jami 75 ta avtotransport vositasiga nisbatan qidiruv tadbirlari olib borilib, shundan 50 tasi topilgan. Qolgan 25 tasi bo‘yicha qidiruv tadbirlari olib borilmoqda. O‘tgan yilning mos davrida esa jami 90 ta avtotransport vositalariga nisbatan qidiruv tadbirlari olib borilgan. Shundan 70 tasi topilib, 20 tasi hozir ham qidirilmoqda. Qidiruvdagi avtotransport vositalarining topilish ko‘rsatkichi o‘tgan yilning mos davriga nisbatan 11 foizga kamaygan.