2022 йилнинг июнь ойида ҳам сўмнинг реал самарали алмашув курси май ойига нисбатан қарийб 0,2 фоизга қадрсизланди. Бу ҳақда Марказий банк шарҳидан маълум бўлди.
Реал самарали алмашув курси ташқи савдо айланмаси, инфляция даражаси ва асосий савдо ҳамкорларининг валюта курсларидаги ўзгаришларни акс эттирувчи кўрсаткичдир.
Июнь ойидаги реал самарали алмашув курсининг қадрсизланиши асосан савдо-ҳамкор давлатлар инфляциясининг юқори суръатларда ўсишининг сақланиб қолиши ва валюта курсидаги ўзгаришларнинг таъсири билан ифодаланади, — дейди Марказий банк.
Сўмга бошқа давлатлар валюта курслари ўзгариши таъсир қилади.
Россия рубли июнь ойида 11,9 фоизга мустаҳкамланди. Асосий сабаб — валютага нисбатан талабнинг пастлиги ва нефть нархларининг юқорилиги.
Қозоғистон тенгеси 3,5 фоизга қадрсизланди. Бу асосан валюта таклифининг чеклангани, йирик компаниялар томонидан дивидендларни репратация қилиниши билан изоҳланади.
Қозоғистон марказий банки 6 июнда асосий ставкани 14 фоизда сақлаб қолди.
Турк лираси 8,6 фоизга қадрсизланди. Инфляциянинг юқори даражада сақланиб қолаётгани ҳамда нефть маҳсулотларининг қимматлашиши Туркия пул бирлигига салбий босим ўтказмоқда.
Июнь ойида Хитойда юань курси деярли ўзгаришсиз қолди.
2022 йил июнь ойида асосий савдо-ҳамкор давлатларнинг деярли барчасида инфляция кўрсаткичи ўсишда давом этди, — дейилади Марказий банк шарҳида.
Россияда ойлик инфляция 0,35 фоиз даражада секинлашди. Йиллик инфляция эса 15,9 фоизни ташкил қилмоқда.
Қозоғистонда ойлик инфляция 1,6 фоизни ташкил этиб, йиллик ҳисобда 14,5 фоизга етди. Июнь ойида инфляциянинг ошишига ноозиқ-овқат маҳсулотлари нархининг қимматлашиши сезиларли ҳисса қўшди
Туркияда ойлик инфляция 4,95 фоизга юқорилаб, йиллик ҳисобда 78,6 фоизгача ўсди. Нархлар ўсишига, асосан, озиқ-овқат машулотлари ҳамда импорт маҳсулотлари катта ҳисса қўшган.
Изоҳ (0)