«Ўзбекистон Республикасининг Солиқ кодексига қўшимча ва ўзгартишлар киритиш тўғрисида»ги қонун билан махсус иқтисодий зоналарнинг иштирокчиларига фойда солиғи бўйича имтиёз берилиши кутлаётгани ҳақида хабар берилган эди. Президент 12 июль куни ушбу қонунни имзолади.
Киритилган қўшимчалар билан махсус иқтисодий зоналарнинг иштирокчиларига фойда солиғи бўйича имтиёз бериш муддатлари белгиланди. Унга кўра, имтиёз муддати инвестиция ҳажмига қараб:
- 3 миллион доллардан 5 миллион долларгача инвестиция учун — 3 йил;
- 5 миллион доллардан 15 миллион долларгача инвестиция учун — 5 йил;
- 15 миллион доллар ва ундан кўп инвестициялар учун — 10 йил муддатга фойда солиғидан озод қилинади.
Эслатиб ўтамиз, ушбу қонун лойиҳаси 8 июль куни сенаторлар томонидан маъқулланганди. Уни ишлаб чиқишга президентнинг 2021 йил 14 сентябрдаги «Махсус иқтисодий зоналар иштирокчиларини янада қўллаб-қувватлаш чора-тадбирлари тўғрисида»ги ПҚ-5243-сон қароридаги вазифалар ва эркин иқтисодий зоналарнинг 100 дан ортиқ иштирокчилари мурожаатлари асос бўлган.
Сенат матбуот хизмати хабарига кўра, ушбу қонун қабул қилиниши натижасида махсус иқтисодий зона иштирокчилари ўз ихтиёрида 47,9 миллиард сўм маблағлар иқтисод қилади. Натижада корхоналарнинг йиллик ишлаб чиқариш ҳажмлари ортиб, қўшимча иш ўринлари ташкил этилишига имкон яратилади.
Қонун расмий эълон қилинган кундан эътиборан кучга кирди.
Изоҳ (0)