Глобал таъминотга босим: G20 давлатларида савдо чекловлари ошиб бормоқда

Ўтган йилнинг октябрь ойидан бошлаб G20 давлатларида савдо чекловлари сони ошиб бормоқда. Бу ҳақда «Коммерсантъ» хабар берди.

Жаҳон савдо ташкилоти (ЖСТ) маълумотларига кўра, майгача бўлган етти ой ичида 53 та шундай чеклов жорий этилган. Ўтган йилнинг шу даврида бу кўрсаткич 14 тани ташкил этганди.

18 та чеклов асосан божларнинг ошиши орқали импортга таъсир кўрсатди. Қолган 35 та чеклов квоталар жорий этиш орқали маҳсулотлар экспортида ўз аксини топди.

Маълумотларга кўра, ушбу чекловлар 18,2 миллиард доллар миқдоридаги экспортга таъсир қилади.

Ўз навбатида, савдони енгиллаштириш бўйича 581,5 миллиард долларлик импортга таъсир кўрсатадиган 97 та янги чеклов тасдиқланди, уларнинг аксарияти ёқилғи, асбоб-ускуналар ва органик кимёвий моддалар импортини енгиллаштириш билан боғлиқ.

ЖСТ Украинадаги уруш муносабати билан жорий қилинган савдо чекловларининг таъсирини алоҳида баҳолади — уруш фонида ишбилармонлик фаоллигининг пасайиши жаҳон савдосининг ўсиш суръатларига салбий таъсир кўрсатмоқда.

ЖСТ прогнозига кўра, жаҳон товарлар савдоси ҳажми жорий йилда 3 фоизга ошади.

Аввалги прогнозда айланма 4,7 фоизга ўсиши кутилган эди. Таққослаш учун, ўтган йили ўсиш 9,8 фоизни ташкил этган.

МДҲ мамлакатларида иқтисодий пасайиш 12 фоизни ташкил қилиши мумкин.

Аввалроқ 2023 йил учун глобал рецессия хавфи ортгани ҳақида хабар берилганди.