«Ўзбекистон Республикасининг Солиқ кодексига қўшимча ва ўзгартишлар киритиш тўғрисида»ги қонун билан махсус иқтисодий зоналарнинг иштирокчиларига улар томонидан киритилган инвестициялар ҳажмидан келиб чиққан ҳолда 3 йилдан 10 йилгача бўлган муддатга фойда солиғидан озод этилиши белгиланмоқда.
Хусусан, 3 миллион доллардан 5 миллион долларгача бўлган миқдордаги инвестициялар учун 3 йил муддатга, 5 миллион доллардан 15 миллион долларгача бўлган миқдордаги инвестициялар учун 5 йил муддатга ва 15 миллион доллар ҳамда ундан юқори миқдордаги инвестициялар учун 10 йил муддатга фойда солиғидан озод этилиши юзасидан Солиқ кодексига қўшимча киритилмоқда.
Қонунда махсус иқтисодий зоналарнинг иштирокчилари томонидан фойда солиғи бўйича имтиёзларнинг 2020 йил 1 январдан кейин фойдаланилмай қолган қисми ҳам татбиқ этилиши белгиланмоқда.
Сенат матбуот хизмати хабарига кўра, ушбу қонун қабул қилиниши натижасида махсус иқтисодий зона иштирокчилари ўз ихтиёрида 47,9 миллиард сўм маблағлар иқтисод қилади. Натижада корхоналарнинг йиллик ишлаб чиқариш ҳажмлари ортиб, қўшимча иш ўринлари ташкил этилишига имкон яратилади.
Қонун 8 июль куни сенаторлар томонидан маъқулланди.
Маълумот учун, ушбу қонун лойиҳасини ишлаб чиқишга президентнинг 2021 йил 14 сентябрдаги «Махсус иқтисодий зоналар иштирокчиларини янада қўллаб-қувватлаш чора-тадбирлари тўғрисида»ги ПҚ-5243-сон қароридаги вазифалар ва эркин иқтисодий зоналарнинг 100 дан ортиқ иштирокчилари мурожаатлари асос бўлган.
Мавзуга доир:
Изоҳ (0)