“O‘zbekiston Respublikasining Soliq kodeksiga qo‘shimcha va o‘zgartishlar kiritish to‘g‘risida”gi qonun bilan maxsus iqtisodiy zonalarning ishtirokchilariga ular tomonidan kiritilgan investitsiyalar hajmidan kelib chiqqan holda 3 yildan 10 yilgacha bo‘lgan muddatga foyda solig‘idan ozod etilishi belgilanmoqda.
Xususan, 3 million dollardan 5 million dollargacha bo‘lgan miqdordagi investitsiyalar uchun 3 yil muddatga, 5 million dollardan 15 million dollargacha bo‘lgan miqdordagi investitsiyalar uchun 5 yil muddatga va 15 million dollar hamda undan yuqori miqdordagi investitsiyalar uchun 10 yil muddatga foyda solig‘idan ozod etilishi yuzasidan Soliq kodeksiga qo‘shimcha kiritilmoqda.
Qonunda maxsus iqtisodiy zonalarning ishtirokchilari tomonidan foyda solig‘i bo‘yicha imtiyozlarning 2020-yil 1-yanvardan keyin foydalanilmay qolgan qismi ham tatbiq etilishi belgilanmoqda.
Senat matbuot xizmati xabariga ko‘ra, ushbu qonun qabul qilinishi natijasida maxsus iqtisodiy zona ishtirokchilari o‘z ixtiyorida 47,9 milliard so‘m mablag‘lar iqtisod qiladi. Natijada korxonalarning yillik ishlab chiqarish hajmlari ortib, qo‘shimcha ish o‘rinlari tashkil etilishiga imkon yaratiladi.
Qonun 8-iyul kuni senatorlar tomonidan ma’qullandi.
Ma’lumot uchun, ushbu qonun loyihasini ishlab chiqishga prezidentning 2021-yil 14-sentabrdagi “Maxsus iqtisodiy zonalar ishtirokchilarini yanada qo‘llab-quvvatlash chora-tadbirlari to‘g‘risida”gi PQ-5243-son qaroridagi vazifalar va erkin iqtisodiy zonalarning 100 dan ortiq ishtirokchilari murojaatlari asos bo‘lgan.
Mavzuga doir:
- O‘zbekiston soliq qonunchiligiga o‘zgartirish kiritishda hukumat tadbirkorlar foydasiga qadam tashladi
- O‘zbekistonda bolalarini xususiy bog‘cha va maktabga yuborayotgan ota-onalar daromad solig‘idan qisman ozod etiladi
- O‘zbekistonda ipakchilik va qorako‘lchilik bo‘yicha ayrim soliq imtiyozlari muddati uzaytiriladi
Izoh (0)