Айрим ижтимоий тармоқларда 1—2 июль кунлари Нукус шаҳрида бўлиб ўтган оммавий тартибсизликлар юзасидан турли хил ёлғон маълумотлар тарқатилиши давом этаётгани сабаб Миллий гвардия яна расмий баёнот билан чиқди.
Маълум қилинишича, тартибсизликлар содир бўлган жойлардан ўқотар қуроллардан отилган гилзалар топилгани акс этган видеотасвирлар тарқатилган. Ушбу гилзалар тинч намойишлар чоғида тинч аҳолини ўлдирган ўқ дорилардан қолгани айтилган, бироқ бу видеотасвирда ҳеч қандай ўлганлар кўрсатилмаган.
«Шу сабабли биз бу хабарлар ёлғон эканини маълум қиламиз. Оммавий ахборот воситалари учун ўтказилган брифингда Миллий гвардия вакиллари ҳақиқий ўқ-дорилар қачон ишлатилиши ҳақида аниқ жавоб берди, аммо бу ерда улар ишлатилмади. Фақат оломонни тарқатиш ва тартибсизликларни бостириш учун махсус воситалар — ёруғлик, шовқин ва тутун ишлатилган.
Аниқлик киритиб ўтамизки, пиротехника воситалари билан тўлдирилган патронларнинг ўқлари махсус 4 ўқли қўшимчали Калашников автоматдан отилади. Албатта бундай махсус воситаларни қўллаш учун автоматга пахтовон ўқлар жойланади. Оламонни тарқатиш учун ишлатилган бу каби махсус воситалар қолдиқларини топиб олган айрим фуқаролар провокацион рухдаги видеохабарларни ижтимоий тармоқларда тарқатишни мақсад қилган. Бироқ ҳуқуқни муҳофаза қилувчи органлар ходимларининг бундай вазиятларда қуроллардан фойдаланиши учун қонуний асослари мавжуд», — дейилади Миллий гвардия хабарида.
Бундан аввал Қорақалпоғистонда тартибсизликлар вақтида чақалоқ жанговар ўқ тегиб жабрлангани, бир неча қурбонлар мурдаси акс этган сурат фейк экани маълум қилинганди.
Мавзуга доир:
Изоҳ (0)