Италияда 70 йил ичидаги энг кучли қурғоқчилик кузатилмоқда

4 июлда Италиянинг сўнгги 70 йилдаги энг кучли қурғоқчиликдан азият чекаётган По дарёси атрофидаги ҳудудларда фавқулодда ҳолат жорий қилинганди.

Маълумотларга кўра, бу ҳудудда мамлакат қишлоқ хўжалиги маҳсулотларининг қарийб учдан бир қисми етиштирилади.

Ҳукумат қарори қоғозбозликни қисқартириш ва зудлик билан чоралар кўриш, масалан, уйлар ҳамда корхоналар учун сув меъёрини белгилаш имконини беради.

По дарёси — Италиядаги энг узун дарё бўлиб, 650 км дан узоқроқ масофани ташкил қилади.

Бироқ сув йўлининг кўп қисмлари қуриб қолган, фермерларнинг айтишича, оқим шу қадар заифки, денгиз суви чуқур сингиб, экинларни нобуд қилмоқда.

Мамлакат фермерлар ассоциацияси етказилган зарарни 3 млрд евродан ортиқ деб баҳоламоқда.

Ҳукумат баёнотида айтилишича, фавқулодда чоралар По дарёси билан чегарадош ерлар ва шарқий Алп тоғлари сув ҳавзаларини қамраб олади.

Умуман олганда, фавқулодда ҳолат беш шимолий минтақа — Эмилия—Романя, Фриули—Венеция—Жулия, Ломбардия, Пемонт ва Венетода амал қилади.

Ҳукумат муаммони ҳал этиш учун 36,5 млн евро ажратди.

Аввалроқ Италия парламентидаги энг йирик партия Украинага қурол етказиб бериш масаласи туфайли парчаланиб кетгани ҳақида хабар берилганди.