Яна бир Европа давлати Россия газидан бутунлай воз кечди

Голландия ҳукумати мамлакат Россиядан газга қарамликни тугатишга муваффақ бўлганини маълум қилди. Бу ҳақда Reuters хабар бермоқда.

Энергетика вазири Роб Жеттен мамлакат газ бўйича Россияга қарамликни тугатганини айтди. Унинг таъкидлашича, минтақадаги ҳар қандай даражадаги газ инқирози Голландияга ҳанузгача таҳдид солмоқда.

Нидерландия 2022 йилнинг биринчи ярмида катта энергия тежашга эришган ва газ истеъмолини деярли 33 фоизга қисқартирган. 

Бу ҳажм Россиядан келадиган ёқилғидан бутунлай воз кечиш учун етарли бўлди. Сўнгги йилларда газ импортининг 15-20 фоизи «Газпром»га тўғри келган.

Шунингдек, Голландияда дунёдаги энг йирик конлардан бири — Гронинген жойлашган бўлиб, у мамлакатнинг ички талабини қондиришга ёрдам беради. 

Коннинг заҳиралари тахминан 450 млрд куб метр газ деб баҳоланмоқда, бу Европанинг Россиядан деярли уч йиллик газ импортига тенг.

Аввалроқ Европа Россия газидан бутунлай воз кечишга тайёрланаётгани ҳақида хабар берилганди.