Олий Мажлис Қонунчилик палатаси депутати Расул Кушербаев Telegram’даги каналида «Судья прокурор билан маслаҳатлашди» сарлавҳали пост қолдирди. Судьялар олий кенгаши ҳолатга муносабат билдирди.
Депутатнинг айтишича, зангиоталик С.Туляганованинг билдирилишича, 29 июнь куни ЖИБ Зангиота туман суди судьяси Д.Т. суд мажлисини соат 17:00 га белгилаган бўлишига қарамай, соат 19:00 га қадар бошламаган. Сабаби прокуратура ходими Ф.О. мажлисга етиб келмаган. Прокуратура ходими келгач, судья алоҳида хонада олдиндан ушбу ходим билан маслаҳат қилиб, соат 19:30 ларда залга кириб мажлисни бошлаган. Унинг прокуратура ходими билан алоҳида маслаҳат қилганини котиб ўз сўзи билан тасдиқлаб қўйган.
Кейин судья ҳеч нарса бўлмагандек, олдиндан ишни пишириб бўлган «маслаҳатчиси» прокуратурага тараф сифатида сўз берган.
«У ёғи нима бўлгани қизиқмас. Муҳими бу ҳақиқат бўлса, судья одил судловни амалга оширишдаги муқаддас қоида: тарафлар тенглиги, суднинг барча, шу жумладан, прокуратурадан ҳоли, мустақил экани, улар билан тил бириктирмаганини амалда кўрсатиб бера олмаган.
Афсуски, мурожаатда айтилганлар бўлиши мумкин: айрим судья ва прокуратура ходимларининг суд биносида бир эшикдан хоналарга кириб чиқиши, алоҳида суҳбатлар қилиши, ошна-оғайни бўлиб кетгани кўз юмиб бўлмас факт», — дейди Расул Кушербаев.
Судьялар олий кенгаши ҳолат юзасидан айни пайтда хизмат текшируви ўтказилаётганини билдирди.
Хизмат текшируви Тошкент вилояти судлари судьялар малака ҳайъати томонидан олиб борилмоқда. Натижаси юзасидан қўшимча ахборот берилади.
Изоҳ (0)